Klubet e Premier Leagues po shpresojnë se mund të shmangin skenarin për zhvillimin e pjesës së mbetur të stinorit në terrene neutrale. Kështu ka thënë shefi ekzekutiv Richard Masters të hënën, pas takimit që kishin të gjitha 20 klubet.
Masters po ashtu ka zbuluar se klubet për herë të parë kanë diskutuar se çka mund të ndodhë nëse stinori nuk do të mund të kompletohet. Por klubet vazhdojnë të besojnë se edicioni mund të zhvillohet deri në fund.
Ky synim mori mbështetje të hënën nga qeveria që ka thënë se sporti elitar mund të kthehet prej 1 qershorit, nëse kushtet mundësojnë kalimin në fazën tjetër.
Javën e kaluar klubeve u është thënë se çdo kthim duhet të bëhet me ndeshje pa shikues dhe në terrene neutrale, për të limituar rrezikun që tifozët të grumbullohen pranë stadiumeve.
Por kjo ide është refuzuar nga disa klube të përballen me rrezikun e rënies nga elita, si Watfordi dhe Brighton & Hove Albion. Këto klube kanë shprehur brenga për korrektësinë e garës nëse ndeshjet luhen në terrene neutrale.
Diskutimet kanë vazhduar në mes të ligës dhe qeverisë lidhur me detajet për atë se si do të vazhdojë gara. Masters ka thënë se klubet shpresojnë të gjejnë një mënyrë për të luajtur ndeshjet në shtëpi dhe në udhëtim.
“Kemi folur për terrenet neutrale. Qartë se është preferencë e të gjitha klubeve tona që të luajnë në shtëpi, nëse kjo është e mundshme. Por të gjithë duhet të jenë të vetëdijshëm për atë që autoritetet po na thonë. Ne do të vazhdojmë bisedat”, ka thënë Masters, raporton Reuters.
Klubet janë pajtuar që të lejojnë lojtarët që kanë kontratë deri më 30 qershor, që t’i vazhdojnë ato deri në fund të edicionit.
Çdo rifillim i edicionit do të bëjë që ndeshjet të luhen përtej 30 qershorit, që normalisht shënon fundin e edicionit.
FIFA ka sugjeruar që kontratat të vazhdohen deri në fund të edicionit, por klubet janë të shqetësuara lidhur me situatën ligjore, nëse lojtarët refuzojnë.
“Ne kemi punuar maksimalisht që të sigurojmë që klubet të kompletojnë edicionin me ekipet e njëjta që i kanë pasur para pezullimit”, ka thënë shefi ekzekutiv i Premier Leagues.
Për vazhdim të kontratave duhet të pajtohen të dy palët. E gjithë biseda e klubeve është zhvilluar për përfundim të edicionit.
“Por asnjë konkluzë nuk është arritur për ndonjërin model. Duhet të ketë bisedime tjera”.
Premier League duhet deri më 25 maj të jap detaje për përfundimin e edicionit. Detajet i kërkon UEFA.
