Katër vende europiane të ashtuquajtura “katërshja kursimtare” prezantuan sot propozimet e tyre të planit të rimëkëmbjes për të ndihmuar Bashkimin Europian për të kapërcyer krizën e shkaktuar nga pandemia e koronavirusit, duke konfirmuar refuzimin e çdo mekanizmi për bashkimin e borxhit europian.
Këto vende kërkojnë një ndihmë urgjente për vendet më të prekura nga kriza si pasojë e COVID-19, por hedhin poshtë perspektivën për çdo rritje të buxhetit të BE-së dhe të një bashkimi të përgjithshëm të borxhit të saj, ashtu si e parashikon plani Merkel-Macron.
“Holanda, Austria, Danimarka dhe Suedia kërkojnë një ndihmë urgjente për vendet më të prekura, në formën e kredive me kushte të favorshme që do të jepen në dy vjet”, sipas një propozimi të publikuar nga zyra e kancelarit austriak, Sebastian Kurz.
“Për më tepër, paratë e huazuara duhet të jenë të orientuara drejt aktiviteteve që kontribuojnë më shumë në rimëkëmbjen, të tilla si kërkimi dhe inovacioni, forcimi i sektorit të shëndetit dhe një tranzicion i gjelbër”, sipas propozimit.
Presidenti francez, Emmanuel Macron dhe kancelarja gjermane, Angela Merkel prezantuan të hënën një plan prej 500 miliardë eurosh për të ringjallur një ekonomi të dëmtuar nga pandemia COVID-19, përmes një mekanizmi të paprecedent të bashkimit të borxheve Europiane.
Fakti që Gjermania u pajtua me idenë e një borxhi të dhënë bashkarisht u perceptua si një kthesë vendimtare në institucionin europian.
Katër vendet vazhdojnë të shprehin kundërshtimin e tyre për bashkimin e borxhit, një proces, sipas tyre, që do t’u mundësonte ekonomive europianë më pak të disiplinuara dhe më të dobëta të përfitojnë padrejtësisht nga financimi më i lirë falë atyre më të fortëve të veriut.
Komisioni Europian do të prezantojë javën e ardhshme planin e saj për stimulimin e rimëkëmbjes ekonomike pas krizës.
