Benjamin Kololli beson se edhe pse Kosova e ka nisur nga pika zero, nga fundi, ajo ka mundësi të arrijë shumë lart, duke këmbëngulur se tani nuk ka përse t’i lakmojë kundërshtarëve të saj, për shkak se, siç thotë, në ndeshjet e fundit ka treguar se luan nivel të futbollit të lartë.
Në një intervistë me gazetën zvicerane “La Matin”, ylli i ekipit kombëtar të Kosovës ka thënë se tani gjërat janë më të lehta për “Dardanët”, pas përvojës që e kanë fituar së bashku si ekip, shkruan Gazeta Express.
Mesfushori i Zurich nuk luajti në barazimin e Kosovës 2:2 kundër Danimarkës në një ndeshje miqësore javën e kaluar, por u paraqit kundër Bullgarisë në një barazim tjetër (1:1), në ndeshjen hapëse të Grupit A kualifikues për Kampionatin Evropian 2020.
Kololli nuk arriti t’i kompletojë 90 minuta për shkak se ndiente shqetësime, por këmbëngul se, siç tregojnë edhe statistikat (62% e posedimit të topit në favor të Kosovës, 12 goditje drejt portës nga verdhekaltrit, kundrejt vetëm 4 nga bullgarët), Kosova i humbi dy pikë që i kishte në duar.
“Ne qartazi i humbëm dy pikë që i kishim në duar. Thjesht na mungoi konkretizimi i rasteve. Por, këtu dy ndeshjet e fundit tregojnë se ne nuk kemi përse t’iu lakmojmë kundërshtarëve. Të gjithë e pamë se e patëm ndeshjen nën kontroll”, tha Kololli për La Matin.
Ai beson se Kosova po kalon nëpër një periudhë fantastike tani, asnjë humbje në 12 ndeshjet e fundit: tetë fitore dhe katër barazime.
“Po kalojmë nëpër diçka të çmendur. Tani ndiejmë se po njihemi nga të gjithë. Në rrugë, çdo kund, të gjithë duan të bëjnë selfie me ne futbollistët”, shtoi ai.
“Ne kemi filluar nga shumë larg, nga fundi, por mund të shkojmë shumë lartë”, shtoi Kololli, i cili ka bërë nëntë paraqitje për Kosovën duke shënuar tri gola.
