Qeveria irlandeze njoftoi sot se po përshpejton përgatitjet për t’u përballur me mundësinë e mosarritjes së një marrëveshjeje mes Britanisë së Madhe dhe Bashkimit Europian për marrëdhëniet e tyre të ardhshme tregtare, me pasoja potenciale shkatërruese për ekonominë.
“Megjithëse qeveria i jep përparësi COVID-19, ne nuk kemi harruar as Brexit-in”, tha kryeministri Leo Varadkar në një konferencë për shtyp pas një këshilli të ministrave.
“Ne duhet të shtojmë përgatitjet në rast se ndodh të mos arrihet një marrëveshje tregtare”, shtoi ai.
Britania e Madhe u largua nga Bashkimi Europian më 31 janar.
Të dyja palët kanë kohë deri në fund të vitit për të rënë dakord mbi dinamikën e ardhshme të tregtisë së tyre.
Bisedimet pritet të rifillojnë të martën pas një raundi të mëparshëm negociatash, në mes të majit, pa përparime të dukshme.
