Ushtrimi i përbashkët taktiko-demonstrues “Western Balkan’s Flash” të njësive speciale të Kosovës, Maqedonisë së Veriut dhe Shqipërisë është mbajtur dje në Shkup.
Në këtë ushtrim, njësitë elite demonstruan aftësitë e tyre operative në tri situata, kur këto njësi intervenojnë në parandalimin e aktiviteteve që kanë të bëjnë në luftën kundër krimit të organizuar.
Aty mori pjesë edhe ministri i Punëve të Brendshme të Kosovës, Ekrem Mustafa, që theksoi se ky ushtrim i përbashkët tregon gatishmërinë e vendeve tona për të bashkëpunuar.
“Bashkëpunimi në fusha specifike, është reflektim i marrëdhënieve të shkëlqyeshme në planin politik, për çka nikoqiri ynë z. Spasovski, ka merita të jashtëzakonshme. Si fryt i këtij bashkëpunimi, ministritë tona, e krahas me këtë edhe Policitë tona, veç tjerash po e kufizojnë hapësirën e veprimit të krimit tej kufitar, duke dekurajuar kriminelët në përgjithësi”, tha ministri Mustafa.
Me këtë rast, ministri Mustafa, në emër të Qeverisë së Kosovës dhe posaçërisht MPB-së, shprehi gatishmërinë permanente për bashkëpunim. Ai tha se marrëveshjet dhe memorandumet e bashkëpunimit e nënshkruara, shprehin vullnetin e tri shteteve tona dhe nevojën për njëri-tjetrin.
Ndërsa ministri i Punëve të Brendshme i Maqedonisë së Veriut, Oliver Spasovski, tha se ndihet krenar me promovimin e këtij aktiviteti, që kontribuon në ruajtjen e paqes dhe sigurisë në rajon.
“Ushtrimi i përbashkët ka vënë në dukje mesazhin e mirë të bashkëpunimit rajonal. Së bashku mund të ndërtojnë një rrjet të bashkëpunimit në ngritjen dhe shkëmbimin e aftësive të njësive speciale”, theksoi ministri Spasovski.
Zëvendësministrja e Punëve të Brendshme e Shqipërisë, Rovena Voda, vlerësoi profesionalizimin e policive të tre shteteve gjatë demonstrimit të ushtrimit.
Ajo theksoi se bashkëpunimi është intensifikuar edhe në kuadër të integrimit evropian të tri vendeve dhe ky bashkëpunim duhet të jetë më intensiv në zhvillimin e përbashkët në luftën kundër krimit të organizuar.
