Britania do të praktikojë karantinën dy-javore për shumicën e njerëzve që vijnë nga jashtë për të kufizuar përhapjen e koronavirusit. Banorët britanikë dhe vizitorët e huaj do të duhet të respektojnë rregullat e izolimit 14-ditor ose të përballen me gjobë prej 1,125 € ose ndjekje penale.
Kritikët po ngrenë pyetjen se pse Britania, e cila është goditur më shumë nga Covid-19 në Europë dhe gradualisht po lehtëson bllokimin, po u shkakton më shumë dhimbje hoteleve dhe linjave ajrore duke ulur udhëtimet nga vendet me më pak raste me virus. British Airways, EasyJet dhe Ryanair kanë filluar procedurat e përbashkëta ligjore kundër qeverisë mbi ato që ata e quajtën një hap “jo-proporcional dhe të padrejtë”.
Pronari i Ryanair tha se plani ishte “i padobishëm” dhe i pazbatueshëm, dhe tha se do të “shkatërrojë mijëra vende pune në turizmin britanik”. Shefi ekzekutiv i Heathrow i Londrës, John Holland-Kaye, tha se këto masa mund të çojnë në humbjen e 25,000 vendeve pune në aeroportin e tij, një e treta e stafit.
Por Sekretari i Shëndetit në Mbretërinë e Bashkuar, Matt Hankok tha se rregullat e reja kishin kuptim sepse “përqindja e infeksioneve që vijnë nga jashtë rritet” ndërsa infeksionet brenda Britanisë bien.
Për të hyrë në Britani me aeroplan, tren, rrugë ose det, udhëtarët duhet të japin detaje për udhëtimin e tyre dhe adresën ku do të izolohen. Se si do të zbatohet karantina ndryshon midis kombeve dhe masat do të vlerësohen çdo tre javë.
Përjashtime janë bërë në disa raste përfshirë për shoferët e kamionëve, për punonjës të kujdesit shëndetësor dhe personat që udhëtojnë nga Irlanda që kanë qenë atje për të paktën dy javë.
