Bayer Leverkuseni është finalisti i parë i Kupës së Gjermanisë në futboll. Bayeri të martën mbrëma fitoi bindshëm, 3:0, ndaj Saarbrueckenit në gjysmëfinalen e parë.
Në gjysmëfinalen e dytë takohen Bayern Muencheni e Eintracht Frankfurti. Kjo ndeshje është të mërkurën nga ora 20:45. Finalja është caktuar të luhet më 4 korrik në Berlin.
Moussa Diaby, Lucas Alario dhe Karim Bellarabi shënuan golat për Bayer Leverkusenin, që renditet në pozitën e pestë në Bundesligë.
Ndërkohë Saarbrueckeni këtë edicion ka garuar në kategorinë e katërt gjermane. Ish-reprezentuesi i Kosovës, Fanol Perdedaj luajti deri në minutën e 68-të për Saarbrueckenin.
Ndërkohë në kategorinë e tretë gjermane të martën mbrëma shënuan gola Valdet Rama e Juergen Gjasula.
