Kryeministri Boris Johnson ka reaguar ndaj ngjarjeve të fundit të dhunshme ndaj statujave dhe përmendoreve në Mbretërinë e Bashkuar. Në një mesazh në rrjetet sociale Johnson ka shkruar:
“Statuja e Winston Churchill në Sheshin e Parlamentit është një kujtesë e përhershme e arritjes së tij për të shpëtuar këtë vend – dhe tërë Evropën – nga tirania fashiste dhe raciste.
Është absurde dhe e turpshme që ky monument kombëtar sot duhet të rrezikohet nga sulmi i protestuesve të dhunshëm. Po, ai ndonjëherë ka shprehur mendime që ishin dhe janë të papranueshme për ne sot, por ai është një hero, dhe ai meriton plotësisht përmendoren e tij.
Tani nuk mund të përpiqemi të modifikojmë ose censurojmë të kaluarën tonë. Ne nuk mund të pretendojmë të kemi një histori të ndryshme. Statujat në qytetet tona u vendosën nga gjeneratat e mëparshme.
Ata kishin këndvështrime të ndryshme, kuptime të ndryshme për të drejtën dhe të gabuarën. Por, ato statuja na mësojnë për të kaluarën tonë, me të gjitha gabimet e saj. Të rrëzosh ata do të ishte gënjeshtra për historinë tonë dhe do të varfërosh edukimin e brezave që do të vijnë.
Sa për demonstrimet e planifikuara, ne të gjithë i kuptojmë ndjenjat legjitime të zemërimit ndaj asaj që ndodhi në Minnesota dhe dëshirën e ligjshme për të protestuar kundër diskriminimit.
Çfarëdo përparimi që ka bërë ky vend në luftimin e racizmit – dhe ka qenë i madh – të gjithë ne e pranojmë se ka shumë punë për të bërë.
Por, është e qartë se protestat janë rrëmbyer për fat të keq nga ekstremistët që synojnë dhunën. Sulmet ndaj policisë dhe aktet e padallueshme të dhunës, të cilat kemi parë javën e kaluar janë të patolerueshme dhe të neveritshme.
E vetmja rrugë përgjegjëse e veprimit është të qëndroni larg këtyre protestave.”
