Kryeministri i Kosovës, Avdullah Hoti, vlerëson se rreziku për mundësinë që Kosova të përfshihet nga vala e dytë e infektimeve me COVID-19 është shumë real. Ai është bazuar në trendin e ditëve të fundit, kur janë raportuar raste të reja e të shumta të infektimeve.
Përmes një postimi në “facebook”, Hotë ka thënë se mund të preken edhe më shumë jetë njerëzish, të thellohet kriza ekonomike dhe të stërngarkohet sistemi i shëndetësisë.
Kryeministri Hoti ka lutur qytetarët që t’iu përmbahen masave obligative për mbrojtje si vendosja e maskave, shmangia e prekjes së fytyrës, pastrimi dhe dezinfektimi i objekteve dhe sipërfaqeve të prekura dhe masa të tjera.
“Lehtësimi i masave për lëvizje të lirë ka qenë i domosdoshëm, por shfrytëzoj rastin që t’iu bëj thirrje sërish që t’i zbatoni me përpikëri masat mbrojtëse. Ne kemi hartuar një ‘Manual për mbrojtje nga përhapja e COVID-19’, ndërsa Ministria e Shëndetësisë në bashkëpunim me IKSHPK-në do të angazhojë rreth 200 profesionistë shëndetësorë që do të monitorojnë zbatimin e këtyre masave”, ka shkruar Hoti.
