Sipas raportit të SNHR-së, në Siri që nga marsi 2011 e deri më tani për shkak të torturave kanë humbur jetën 14.388 persona, përfshirë 177 fëmijë dhe 63 femra
Rrjeti Sirian për të Drejtat e Njeriut (SNHR), njoftoi se që nga marsi 2011 e deri më tani në Siri gjithsej 14.388 persona kanë vdekur nga torturat shumica e të cilave të kryera nga regjimi i Bashar Al-Asadit, raporton Anadolu Agency (AA).
SNHR, që dokumenton shkeljet e të drejtave kundër civilëve, me rastin e 26 qershorit, Ditës Ndërkombëtare për Solidarizimin me Viktimat e Torturave ka përgatitur një raport special për Anadolu Agency (AA) lidhur me personat që kanë humbur jetën për shkak të torturave në Siri.
Sipas raportit, në Siri që nga fillimi i kryengritjes së popullit në mars 2011 e deri më tani për shkak të torturave kanë humbur jetën 14.388 persona përfshirë 177 fëmijë dhe 63 femra, shumica e të cilëve nga ana e regjimit të Bashar Al-Asadit.
Në kuadër të raportit theksohet se regjimi i Asadit ka vrarë me këtë mënyrë 14.235 persona, 173 prej të cilëve fëmijë dhe 46 femra.
Ndërsa organizata terroriste YPG/PKK ka masakruar duke torturuar 52 persona, prej të cilëve 1 fëmijë dhe 2 femra. Kurse organizata terroriste DEASH ka vrarë duke torturuar 32 civilë, prej të cilëve 1 fëmijë dhe 14 femra.
Ndërkohë opozitarët ushtarakë dhe grupet e armatosura kundër regjimit kanë shkaktuar vdekjen si pasojë e torturave të 69 personave, përfshirë 2 fëmijë dhe 1 femër.
Në raport theksohet se forcat e regjimit të Asadit përgjatë luftës së brendshme kanë zbatuar tortura të ndryshme ndaj 1.2 milionë sirianëve dhe se një pjesë e madhe e këtyre personave janë ende të burgosur.
Në raportin ku theksohet se “Regjimi sirian aplikon torturën për të marrë hak ndaj opozitarëve”, njoftohet se forcat e regjimit aplikojnë 72 mënyra të torturave fizike, psikologjike dhe seksuale ndaj personave që mban nëpër burgjet e tij.
Ndër të tjera, në raport theksohet se të arrestuarit jetojnë në mungesë të kushteve shëndetësore dhe se në shumicën e burgjeve të regjimit qëndrojnë 50 persona në një hapësirë mesatarsisht 24 metër katror.
Pas përhapjes së koronavirusit të ri (COVID-19) në rajonet e regjimit, rrjeti SNHR ka theksuar se personat nëpër burgje përballen me rrezikun e jetës.
Burimet opozitare bëjnë të ditur se aktualisht nëpër burgjet dhe qendrat e marrjes në pyetje të regjimit mbahen të burgosur të paktën 500 mijë njerëz.
