Fituesi i Çmimit Oskar, Ennio Morricone ka ndërruar jetë gjatë natës në një klinikë në kryeqytetin Romë për shkak të pasojave pas një rënie aksidentale.
Muzikanti dhe kompozitori i shkëlqyeshëm 91 vjeçar, ishte autor i tingujve më të bukur të kinemasë italiane dhe botërore, në filma të tillë si “Per un pugno di dollari”, “C’era una volta in America”, “Nuovo cinema Paradiso” apo dhe “Malena”.
“Ceremonia funebër e Ennio Morricone do të mbahet në formë private”- njoftoi avokati i familjes.
Sipas tij, Morricone deri në frymën e fundit ka qenë i kthjellët dhe i përgjegjshëm.
“Ai ka përshëndetur gruan e tij Maria, e cila e ka shoqëruar atë me përkushtim në çdo moment të jetës së tij njerëzore dhe profesionale dhe ka qenë afër tij deri në frymën e fundit, ka falënderuar fëmijët dhe nipërit e tij për dashurinë dhe kujdesin që i kanë dhënë si dhe ka falënderuar audiencën e tij, e cila e ka përkrahur dhe e ka dashur duke e frymëzuar në krijimtarinë e tij”, shkruhet në deklaratën e avokatit.