Kolla m’u rikthye pa paralajmëruar dhe në dukje pa asnjë arsye dhe po kështu edhe lodhja, por një gjë është e vërtetë, nuk ka asgjë më ligështuese, madje edhe më tepër sesa kur isha infektuar vërtet nga virusi, shkruan për përvojën e tij me Covid-19, gazetari i famshëm i CNN-it, Richard Quest, kryeredaktor për çështjet e biznesit në rrjetin e njohur informativ amerikan.
“Unë u infektova në mes të prillit. Simptomat më filluan shumë shpejt. Papritur vura re që ndihesha shumë i lodhur dhe pata kollë. Bëra testin dhe pasi mora një telefonatë nga qendra mjekësore, rezultoi se kisha dalë pozitiv për koronavirus.
Virusi ngjan me një tornado. Kur vjen, të prek gjithë trupin duke shkaktuar kaos, konfuzion dhe duke shkaktuar dëme në secilin organ që prek. Disa nuk do t’i mbijetojnë vizitës së virusit. Unë kam pasur simptoma të buta pasi kurrë nuk kam pasur vështirësi në frymëmarrje, humbje të nuhatjes apo shijes. U treta nga lodhja dhe gjithmonë kisha kollën që më bezdiste, e cila më është rikthyer përsëri.
Kollitja që vjen nga Covid nuk është si një kollë e zakonshme, ajo që mjekët e quajnë me mirësjellje “kollë produktive”. Unë do ta quaja si diçka të veçantë pasi është një kollë e thatë, e butë, e vrazhdë. Në rastin tim, në fillim nisi si një kollë e thatë, më pas e vrazhdë dhe me shtrëngime në gjoks. Unë rezultova negativ për virusin dhe pozitiv për antitrupat dhe doktori më tha që nuk kisha përse të shqetësohesha por unë e di që kjo kollë që kam nuk është kollë e zakonshme.
Jam duke zbuluar edhe probleme të tjera që kam në organizëm: Tani jam bërë shumë i ngathët. Unë kurrë nuk kam qenë një person i shkathët por që të bëhesha kaq përtac e i ngathët është përtej pritshmërive të mia. Nëse dua të marr një gotë në dollap, do ta përplas ose do të më bjerë në dysheme. Përplasem vazhdimisht me orenditë. Është sikur ajo pjesë e trurit tim, që në mënyrë të pavetëdijshme instiktive përshtat duart dhe lëvizjet e trupit ndaj pengesave që shoh, duket sikur nuk funksionon.
Ndonjëherë kam një ndjesi konfuzioni, por të shkurtër. Apo një vonesë sa hap e mbyll sytë për një mendim apo hezitim për ndonjë fjalë. Askush nuk do ta vinte re, por unë po.
Nuk di çfarë t’i quaj, simptoma apo efektet pas Covid-19, por ajo çfarë di të them është se trupi im nuk ndihet mirë. Mjekët përpiqen të më sigurojnë duke më thënë, se çdo gjë do të kalojë por ata nuk më thonë se kur. Java e kaluar ishte e tmerrshme. Nuk më pushonte kolla për ditë rresht, isha i lodhur dhe kisha shumë nevojë të flija. Ndihem i shqetësuar, por ende nuk kam panik. Më duket se kjo javë ishte më ndryshe se java e kaluar dhe mendoj se ndihem pak më mirë.
Për ata që nuk kanë qenë të infektuar me Covid, ose kanë qenë dëshmitarë të problemeve që lë pas, unë ju bëj thirrje, bëni gjithçka që mundeni për të shmangur këtë tornado.
Do të përshkojë të gjithë trupin tuaj, do të dëmtojë çdo organ gjatë rrugës së tij dhe pastaj kur të mendoni se e keni kaluar dhe të falënderoni Zotin, do të kuptoni që pavarësisht se ai është zhdukur nga ju, dëmi që ka shkaktuar ngelet ende në organizmin tuaj. Covid-19 është një tornado me një bisht shumë të gjatë.”, shprehet ai.
