Britania njoftoi se kundërshton rezultatet e zgjedhjeve të fundit presidenciale në Bjellorusi, duke dënuar aktet e dhunës nga autoritetet e vendit kundër protestave paqësore, transmeton Anadolu Agency (AA).
Sekretari i Jashtëm britanik, Dominic Raab, tha në një deklaratë: “Bota ka shikuar me tmerr dhunën e përdorur nga autoritetet bjelloruse për të shtypur protestat paqësore që pasuan këto zgjedhje mashtruese presidenciale. Britania nuk pranon rezultatet. Ne kemi nevojë urgjente për një hetim të pavarur përmes OSBE-së për shkeljet që u regjistruan në zgjedhjet e padrejta, si dhe shtypjen e ashpër që pasoi”.
Raab nënvizoi se Britania do të punojë me partnerët ndërkombëtarë për të sanksionuar personat përgjegjës për zgjedhjet dhe dhunën, duke “konsideruar përgjegjës autoritetet e Bjellorusisë”.
Sipas rezultateve zyrtare të zgjedhjeve të shpallura të premten e kaluar, presidenti i Bjellorusisë Alexandar Lukashenko fitoi me 80,1 për qind të votave, ndërsa liderja e opozitës Svetlana Tikhanovskaya u rendit e dyta me vetëm 10,12 për qind.
Që nga shpallja e rezultateve, dhjetëra mijëra bjellorusë kanë demonstruar kundër Lukashenkos, duke brohoritur me parulla dhe duke mbajtur flamurin kuq e bardhë të cilin Bjellorusia e ka përdorur para vitit 1995.
