Kryeministri Avdullah Hoti ka nënshkruar marrëveshje ndërmjet Kosovës dhe Bashkimit Evropian, për programet IPA 2019 dhe pjesën e dytë, IPA 2020
Kjo është bërë e ditur përmes një njoftimi nga zyra për informim e kryeministrit të vendit, ku është theksuar se Kosova do të përfitojë në total 130 milionë euro nga BE-ja.
“Procedurat për hyrjen në fuqi këtyre marrëveshjeve do t’i nisin sa më parë që të jetë e mundur, kurse me hyrjen e tyre në fuqi, Kosova do të përfitojë në total 138 milionë euro nga BE-ja, ndërsa këto fonde do të zbatohen të kombinuara me më shumë se 40 milionë euro fonde të tjera në formë huamarrjeje nga institucionet financiare ndërkombëtare për projekte të mëdha infrastrukturore nga fusha e mjedisit, energjisë dhe bujqësisë, si dhe bashkëfinancim nga ana e Qeverisë së Kosovës për disa nga projektet”, thuhet në njoftim.
Kosova do të përfitojë edhe 20.5 milionë euro si grant në buxhet gjatë këtij viti për të ndihmuar stabilitetin fiskal dhe 6 milionë euro të tjera vitin e ardhshëm.
“Nga këto programe, përveç të tjerash, Kosova do të përfitojë 20.5 milionë euro si grant në buxhet këtë vit për të ndihmuar stabilitetin fiskal të vendit dhe 6 milionë euro të tjera vitin e ardhshëm. Zbatimi i projekteve të financuara nga këto programe do ta nxisë riaktivizimin ekonomik të vendit dhe do të ndikojë fuqishëm në rimëkëmbjen ekonomike të vendit”, thekson njoftimi.