ALBUK TV ka ndër marr nismën “Stop lajmeve me përmbajtje diskriminuese ndaj shqiptarëve!”.
Televizioni i parë shqiptar në Britani këtë nismë e ka filluar duke marrë shkas nga “bombardimi” me lajme diskriminuese ndaj shqiptarëve, kryesisht në Britani nga mediat kombëtare Top Channel dhe TvKlan.
Kjo nismë ka të bëjë me nënshkrimin e peticionit kundër lajmeve me përmbajtje diskriminuese.
Njoftimi i plotë:
STOP LAJMEVE DISKRIMINUESE NDAJ SHQIPTARËVE !
Nënshkruani dhe shperndani peticionin: https://www.change.org/…/top-channel-albania-stop…
Duke marrë shkas nga “bombardimi” me lajme diskriminuese ndaj shqiptarëve kryesisht në Britani nga mediat kombëtare Top Channel dhe TvKlan, ALBUK TV merr nismën “Stop lajmeve me përmbajtje diskriminuese ndaj shqiptarëve!”.
Pothuajse çdo ditë në mediat e Shqipërisë ka lajme, të cilat paraqesin shqiptarët që banojnë jashtë vendit si padronë të aktiviteteve kriminale apo kultivimit dhe tregtimit të lëndeve narkotike nëpër botë.
Nëse aktiviteti kriminal nuk kryhet në Republikën e Shqipërisë, mediat shqiptare duhet të minimizojnë lajmet dhe të fokusohen te miliona shqiptarë në mërgim, të cilët shkollohen, punojnë e jetojnë me djersën e tyre duke kontribuar si në vendin ku banojnë, po ashtu edhe në Shqipëri.
Shqiptarët nëpër botë ndeshen çdo ditë e më shumë me reagime raciste apo paragjykuese si pjesë e “krimit apo “mafias”. Shkaktarë të këtij imazhi të krijuar, përveç të tjerave janë jo vetëm media të caktuara jo-shqiptare, por dhe mediat tona kryesisht kombëtare.
Iu kërkojmë mediave shqiptare të ndalin lajmet me përmbajtje kriminale për shqiptarët jashtë territorit të Republikës së Shqipërisë, pasi ata që janë pjesë e kontigjentit kriminal janë shtetas të vendeve ku jetojnë dhe përgjegjësia bie mbi shtetin përkatës.
Po ashtu, transmetimi në mënyrë të shpeshtë të këtyre lajmeve, është një formë promovimi që i bëhet krimit, duke nxitur të rinjtë shqiptarë të ndërmarrin këtë rrugë.
