Prej disa tashmë në grevë për pagat e tyre, naftëtaret kanë folur për vështirësitë e mëdha që kanë kaluar dhe për sinjalet se sakrifica e tyre po bie në veshin e shurdhët të qeverisë.
Grevistet janë vizituar nga dy ish deputete gra të Partisë Demokratike, Orjola Pampuri e Dhurata Çupi. Para ish deputeteve, grevistet janë shprehur të zhgënjyera për mungesën e përgjegjësisë nga ana e qeverisjes së socialistëve.
“Të mbushet xhepi i Arben Ahmetaj dhe i Erjon Braçes dhe Edi Ramës. Paga ime është kacidhe para lekëve që marrin ata. Edi Rama na premtoi se “ari i zi” do të kalojë në Uzinë dhe lekët e prapambetura punëtorët do t’i marrin. Ku është Beso Sulaj? Heshtin. Gropa e zezë nuk është Uzina, gropa e zezë është qeveria, është Edi Rama që po shkatërron gjithçka”, tha një greviste.
“Ministrja Belinda Balluku është femër. Le të na japë përgjigje negative. Do ta përtypim. Por vetëm të vijë”, tha një greviste tjetër.
Të tjera greviste u shprehën se kurrë nuk kishin menduar se do t’u duhej të hynin në një grevë urie për të marrë ato para që i kanë fituar me punën e tyre. Njëra prej grave madje tha se para 40 vitesh, ka qenë pjesë e punëtorëve që hapën themelet për uzinën e Ballshit, ndërsa sot pas 4 dekadave punë, është e detyruar të bëjë grevë për bukën e gojës.
“Jemi gra të shkolluara. Nuk e kam menduar asnjëherë veten në grevë, por gjendja ekonomike na solli këtu. Jemi pa bukë. Kemi lënë familjen. Jemi në borxhe dhe kredi deri në fyt. Jemi detyruar të hymë në grevë për pagat e prapambetura, të cilat nuk i kemi marrë prej dy vjetësh”, tha një tjetër greviste.
“Ne duam që të na ikin lotët një herë e përgjithmonë. Përpara 40 vitesh kam hapur themelet e Uzinës, sot jam këtu për bukën e gojës. Kjo është e rëndë”, tha një tjetër grua greviste.
