Pas shumë rasteve të diagnostikuara me demencë nga futbollistët që i dhanë Kupën e Botës Anglisë në vitin 1966, preket nga një sëmundje e tillë gjithashtu edhe ish-lojtari i famshëm i përfaqësueses së “tre luanëve”, si dhe ish-kapiteni legjendar i Manchester United, Bobby Charlton. 83-vjeçari që konsiderohet si futbollisti anglez më i madh i të gjitha kohërave, u diagnostikua me demencë dhe lajmi u bë i ditur nga vetë familjarët e ish-lojtarit të famshëm të “djajve të kuq”, që ka zhvilluar plot 606 ndeshje në kampionat në harkun e 17 sezoneve me fanellën e United.
Në më pak se katër muaj ndërruan jetë nga një sëmundje e tillë edhe dy emra të tjerë të mëdhenj nga kombëtarja angleze që triumfoi në kampionatin botëror të 1966, si Jack Charlton dhe Nobby Stiles. Sir Bobby Charlton humbi vëllanë e madh më datë 10 korrik, pikërisht nga po e njëjta sëmundje, ndërkohë një tjetër emër i madh i “red devils” si Nobby Stiles, edhe ky një ndër heronjtë e ekipit të famshëm të drejtuar nga Alf Ramsey, ndërroi jetë ditën e premte në moshën 78-vjeçare pasi ishte diagnostikuar më parë me demencë.
Me t’u publikuar lajmi kanë qenë të shumtë ata që nxituan për të dërguar mesazhe në adresë të ish-futbollistit të famshëm të Manchester United. Një ndër të parët ishte pikërisht sulmuesi aktual i “djajve të kuq” Marcus Rashford, që e konsideroi ish-kapitenin legjendar të ekipit si heroin e tij dhe në një postim i bëri thirrje 83-vjeçarit për të qëndruar i fortë. Bashkëshortja e tij Norma Charlton sqaroi për “Telegraph” se publikimi i një lajmi të tillë përveç ndërgjegjësimit do të shërbejë gjithashtu edhe për të ndihmuar ish-futbollistët e tjerë që vuajnë nga po e njëjta sëmundje.
Drejtuesit e United shprehën keqardhjen e tyre në emër të të gjithë stafit, lojtarëve apo dhe fansave të shumtë të klubit, për faktin që një sëmundje e tillë e tmerrshme preku pikërisht Sir Bobby Charlton-in, madje krerët e klubit shtuan se do të vazhdojnë të ofrojnë dashurinë dhe mbështetjen e tyre për futbollistin legjendar të “djajve të kuq”, si dhe familjen e tij. Deri në vitin 1973 Bobby Charlton shënoi plot 199 gola në kampionatin anglez me fanellën e “red devils”. Gjithsej Bobby Charlton ka realizuar 249 gola në 758 ndeshje në të gjithë kompeticionet me Manchester United, klub ku ish-kapiteni legjendar i klubit u kurorëzua me tre tituj kampion, 1 FA Cup dhe 1 Kupë Kampionesh gjatë karrierës së tij 17-vjecare me “djajtë e kuq”.
Bobby Charlton mbeti për shumë kohë si golashënuesi më i mirë në historinë e klubit dhe rekordi i tij u thye vetëm në fundin e janarit të vitit 2017, nga Wayne Rooney që preku shifrën e 250 golave në takimin e tij të 546 dhe sezonin e 13 me United, pas transferimit nga Evertoni. Wayne Rooney ishte sulmuesi që theu gjithashtu rekordin e tij të golave edhe me përfaqësuesen, në takimin me Zvicrën në vitin 2015, ndërsa rekordi i ndeshjeve me fanellën e “red devils” u thye që në vitin 2008 nga Ryan Giggs. Në moshën 20-vjeçare Bobby Charlton i mbijetoi në vitin 1958 një aksidenti ajror në aeroportin e Mynihut, ku humbën jetën 23 vetë, përfshirë edhe 8 futbollistë të Manchester United.
Ai shënoi dy herë në finale ndaj Benfica-s dhe udhëhoqi ekipin në Kupën e Kampioneve që klubi fitoi në “Wembley” në vitin 1968, ndërsa dy vjet më herët ai meritoi çmimin e “Topit të Artë”, pasi luajti çdo minutë për përfaqësuesen angleze në kampionatin botëror të vitit 1966. Bobby Charlton është futbollisti i pestë nga heronjtë e botërorit të vitit 1966 që është diagnostikuar me demenca, pas emrave të tillë si Jack Charlton, Nobby Stiles, ndërkohë që humbën jetën nga kjo sëmundje në vitet 2018 e 2019 respektivisht edhe Ray Wilson e Martin Peters.
Sipas një studimi të Universitetit të Glasgow-t të kryer në vitin 2019, pas vdekjes në moshën 59-vjeçare të ish-sulmuesit të West Brom-it Jeff Astle, ku u bë krahasimi i të dhënave të 7.676 ish-futbollistëve me 23.000 persona të zakonshëm nga popullsia e përgjithshme doli se ish-lojtarët profesionistë janë 3,5 herë më të ekspozuar për të vdekur nga sëmundja e demencës, sesa njerëzit e tjerë me po të njëjtën moshë dhe shkak mendohet se janë pikërisht goditjet e shpeshta të topit me kokë, apo dhe traumat në kokë që pësojnë futbollistët gjatë karrierës së tyre. Për të nderuar karrierën e tij brilante në vitin 2016 drejtuesit e Manchester United i vunë emrin e Bobby Charlton-it pikërisht tribunës jugore në “Old Trafford”, që është njëherësh edhe stadiumi i dytë më i madh në Mbretërinë e Bashkuar pas “Wembley”-t.
