Sipas kufizimeve, njerëzve u kërkohet të mos largohen nga shtëpitë e tyre nëse nuk është e nevojshme, të punojnë nga shtëpia nëse munden dhe të shmangin takimin me më shumë se një person në të njëjtën kohë
Miliona britanikë nga sot do të qëndrojnë në shtëpi në kuadër të një bllokimi të dytë kombëtar për të frenuar përhapjen e koronavirusit të ri (COVID-19).
Sipas kufizimeve, njerëzve u kërkohet të mos largohen nga shtëpitë e tyre nëse nuk është e nevojshme, të punojnë nga shtëpia nëse munden dhe të shmangin takimin me më shumë se një person në të njëjtën kohë.
Dyqanet jo-thelbësore, baret, restorantet dhe palestrat do të qëndrojnë të mbyllura deri në fund të bllokimit, respektivisht deri më 2 dhjetor.
Masat e reja hyjnë në fuqi mes një vale të dytë të pandemisë që javëve të fundit ka sjellë një rritje të lartë si të infeksioneve ashtu edhe të vdekjeve.
Sipas të dhënave nga autoritetet shëndetësore, së fundmi u zbuluan 25.177 raste të reja të koronavirusit në të gjithë Mbretërinë e Bashkuar, shifër e dytë më e lartë e regjistruar, duke e çuar numrin e përgjithshëm të tyre në pothuajse 1.1 milionë.
Po ashtu 482 vdekje nga virusi u regjistruan, me çka numri i përgjithshëm i vdekjeve u rrit në 47.742.
Dje, kryeministri britanik Boris Johnson tha se ai nuk është “i përgatitur të rrezikojë me jetën e britanikëve”, duke theksuar se pa një bllokim të ri do të ketë vdekje “në një masë të rëndë”.
Johnson tha se Shërbimi Shëndetësor Kombëtar (NHS) pa kufizime se do të ishte në “telashe të jashtëzakonshme” muajin e ardhshëm.
Kancelari Rishi Sunak pritet të bëjë një njoftim mbi skemën e punës, sipas të cilës qeveria paguan 80 për qind të pagave të njerëzve që humbin punën e tyre për shkak të bllokimeve.
