“Shpresoj se hapat e fundit që kemi ndërmarrë do të sigurojnë paqen afatgjate për popullin e Armenisë dhe Azerbajxhanit”, tha Putin
Moskë
Presidenti i Rusisë, Vlladimir Putin, shprehu kënaqësinë me rastin e nënshkrimit të marrëveshjes për ndërprerjen e konfliktit në Malësinë e Karabakut, raporton Anadolu Agency (AA).
Putin në video konferencën e Organizatës së Shangajit për Bashkëpunim foli për marrëveshjen e nënshkruar mbrëmë për t’i dhënë fund konfliktit në Malësinë e Karabakut.
“Shpresoj se hapat e fundit që kemi ndërmarrë do të sigurojnë paqen afatgjate për popullin e Armenisë dhe Azerbajxhanit”, tha Putin.
Presidenti rus ngjarjen në Karabak e karakterizoi si “tragjedi” dhe theksoi se marrëveshja do të ndalë gjakderdhjen e mëtutjeshme.
Armenia dhe Azerbajxhani arritën marrëveshje për dhënien fund të përleshjes në Malësinë e Karabakut. Marrëveshja është arritur mbrëmë me ndërmjetësim të Rusisë dhe parasheh tërheqjen e forcave armene nga Lachin, Kalbajar dhe Agdam.
Presidenti azerbajxhanas, Ilham Aliyev, në adresimin para kombit tha se marrëveshja është fitore për Azerbajxhanin, ndërsa disfatë e Armenisë.
Në Azerbajxhan qytetarët dolën në rrugë dhe festuan marrëveshjen, ndërsa në Armeni qytetarët dolën në protesta për shkak të dokumentit të nënshkruar.
