Kryetari i Komisionit Qëndror të Zgjedhjeve, Ilirjan Celibashi, në një dalje për mediat është shprehur kundër propozimit të minsitrit të Diasporës, Pandeli Majko, i cili tha se emigrantët mund të votojnë edhe pa një adresë banimi.
Sipas Celibashit, asnjë emigrant nuk do të lejohet të votojë në zgjedhjet e 25 prillit nëse nuk ka statusin e emigrantit dhe adresën ku banon.
“Për të qenë votues në zgjedhjet e 25 prillit dhe më tej në zgjedhjet e radhës, pikësëpari duhet të jesh i identifikuar i qartë si emigrant, si një qytetar i Republikës së Shqipërisë me të drejtë vote por që e ke vendbanimin jashtë Republikës së Shqipërisë. Të jetë identifikuar qartë fakti që ju jeni banor psh i Romës në Itali dhe mbi këtë kusht duhet të shprehësh vullnetin dhe dëshirën për të votuar atje ku ke vendbanimin”, tha Celibashi.
Brenda 3 ditëve KQZ do të miratojë edhe mënyrën se si do të krijohet lista e zgjedhësve, pasi të marrë përgjigjen nga Gjendja Civile.
“Brenda këtij viti të kemi të qartësuar sesi do të jetë mënyra e krijimit të listës së këtyre zgjedhësve. Elementët e tjerë si do t’u dërgohet fleta e votimit, si ata do ta dërgojnë fletën e votimit këtu apo sesi do të votojnë, ne akoma nuk kemi qoftë dhe në mënyrë të përafërt një ide”, tha kreu i KQZ-së.
