Tre vjet pas një proteste të organizuar në rrjetet sociale për heqjen e një flamuri turk nga diga e një hidrocentrali të ndërtuar nga një kompani turke, Gjykata e Lezhës shpalli fajtor dhe dënoi me dy vite burg një emigrant 36-vjeçar.
Leon Molla u dënua për veprën penale “Nxitja e urrejtjes ose grindjeve”, pasi edhe pse nuk ndodhej në Shqipëri nga hetimet ka rezultuar se ai ka qenë organizator i tubimit në Mirditë.
Sipas dosjes hetimore përmes shkrimeve dhe videomesazheve në rrjetet sociale i riu ju ka bërë thirrje njerëzve që të mblidhen për të hequr flamurin Turk në Qafë-Mollë të Mirditës, duke nxitur gjuhen e urrejtjes.
Gjykimi ndaj tij është bërë në mungesë, pasi Molla me origjinë nga Mirdita jeton ne Francë që prej vitit 2012, ndërsa prokurori Arben Agovi kishte kërkuar që ai të dënohet me tre vite heqje lirie, por gjykata dha një dënim më të butë ndaj tij.
Në lidhje me tubimin u referuan materialet në prokurori edhe për 60 persona të tjerë pjesëmarrës, por hetimet ndaj tyre u pushuan, pasi sipas prokurorisë nuk janë provuar element të veprës penale./Ora News/
