Qeveria e Kosovës dhe ajo e SHBA-së kanë nënshkruar marrëveshje për nxitje të investimeve. Kështu ka bërë të ditur ministrja e Punëve të Jashtme dhe Diasporës, Meliza Haradinaj-Stublla.
Ajo përmes një postimi në Facebook ka thënë se marrëdhënia kryesore strategjike e Kosovës me Shtetet e Bashkuara të Amerikës thellohet edhe më tej sot me nënshkrimin e kësaj marrëveshjeje, për të cilën thotë ta kenë propozuar e miratuar në mbledhjen e Qeverisë më 7 tetor 2020. K
“Kjo marrëveshje që u nënshkrua sot nga Qeveria e Kosovës dhe Qeveria e SHBA-ve, afirmon dëshirën e përbashkët për nxitjen e aktiviteteve shumë të nevojshme ekonomike amerikane në Republikën e Kosovës që promovojnë zhvillimin e burimeve dhe kapaciteteve ekonomike të Republikës së Kosovës, rrisin punësimin, prosperitin e mirëqenien për qytetarët e Kosovës”, ka shkruar ajo.
Sipas saj, kjo marrëveshje mundëson konkretizimin e zotimeve për projekte ekonomike të Kosovës dhe Qeverisë së Shteteve të Bashkuara të Amerikës, të ndërmarra në Marrëveshjen e datës 4 Shtator 2020 në Washington D.C.
“Zoti i bekoftë Shtetet e Bashkuara të Amerikës si djep i lirisë dhe prosperitetit, që Kosovës i qëndroi pranë gjithmonë. Zoti e bekoftë Kosovën 🇽🇰 dhe miqtë e saj të vërtetë”, ka shkruar tutje ajo.
