Nënkryetari i Partisë Lëvizja Socialiste për Integrim (LSI), Petrit Vasili akuzoi qeverinë se nuk ishte në krye të detyrës për të përballaur situatën e përmbytjeve në vend dhe se ndërhyri vetëm pas thirrjeve të opozitës dhe Presidentit.
“Kryeministri dhe qeveria e tij nuk ishin në krye të detyrës dhe vetëm thirrjet e vazhdueshme, insistuese të opozitës dhe Presidentit të Republikës bënë që së paku formalisht për sy e faqe të mblidheshin e të bënin ndonjë lëvizje, ndonjë veprim, gjithmonë për show, për televizor, sepse veprime konkrete nuk bën asnjë”, shtoi Vasili.
Sa i përket shifrave të publikuara një ditë më parë nga kryeministri, Vasili tha se Fierza në këtë situatë të tanishme nuk ka bërë shkarkime, pasi ka pasur disnivele, ndërsa në atë kohë shkarkimet janë bërë sepse situata ishte kritike dhe prurjet ishin të jashtëzakonshme.
“Në vitin 2021, sot pra, Fierza ka pasur nivelin maksimal 288 metra, kurse në vitin 2010-2011 ka qenë 298 metra, ndërsa hidrocentrale të tjera shumë të rëndësishme të kaskadës si Komani dhe Vau i Dejës sivjet kanë qenë 178 metra Komani dhe Vau i Dejës në 75.5 metra, ndërkohë që në 2011 këta kanë qenë në nivelet e tyre maksimale dhe të detyruar për shkarkim”, u shpreh ai./ATSH/
