Gjatë takimit të saj me të rinjtë në Fier që në zgjedhjet e 25 prillit votojnë për herë të parë, kryetarja e LSI Monika Kryemadhi ka folur edhe mbi digjitalizimin, fenomen i cili i ka bërë njerëzit më asociale.
Madje, Kryemadhi rrëfeu se dikur shkëmbente letra dashurie me Ilir Metën, ndërsa tani gjithçka është kthyer “online”.
“Sot në kuadrin e ndryshimit dhe dixhitalizimit të çdo gjëje, faktikisht ka sjellë edhe një lloj mund të quajmë… janë bërë të rinjtë asocialë. Unë me Ilir Metën kemi pas shkruajtur letra dashurie, por tani ka shkuar çdo gjë me mesazhe. Edhe dashuria është vetëm elektronikisht. Ne nuk mund ta kthejmë jetën dhe shoqërinë tonë çdo gjë virtuale dhe dixhitale. Komunikimi njerëzor na bën më socialë, më jetësorë. Ashtu sikurse nuk mund të rritet fëmija me dashurinë e prindit në kontakt virtual”, tha Kryemadhi.
“Dhe mendoj që ne duhet të socializojmë rininë e Fierit, sidomos gjimnazistët. Dhe socializimi i tyre nuk vjen thjesht duke u përfshirë në projekte politike, socializimi vjen duke u përfshirë në vendimmarrje, gjë që është shumë më e rëndësishme. Dhe ajo që mendoj, që ne e kemi pjesë të programit, krijimi i hapësirave për të rinjtë dhe për të rejat, jo thjesht në kuadrin politik, por në kuadrin edhe shoqëror, kulturor, por edhe arsimor”, vijoi kryetarja e LSI.
