Britania e Madhe ka regjistruar sot 1 820 të vdekur nga COVID-19 gjatë 24 orëve të fundit, një rekord tjetër ditor, ndërkohë që kryeministri Boris Johnson ka parashikuar se bilanci do të vazhdojë të rëndohet.
Këto shifra të publikuara nga Ministria e Shëndetësisë e çojnë në 93 290 viktima bilancin ttoal të pandemisë në Britaninë e Madhe, më i rëndi në Europë.
Në 24 orët e fundit, 38 905 raste me COVID-19 janë regjistruar duke konfirmuar rritjen këto ditët e fundit për një total prej më shumë se 3,5 milionë raste.
“Këto shifra janë të tmerrshme”, theksoi Boris Johnson.
“Dhe më duhet t’ju paralajmëroj se kjo do të vazhdojë sepse ajo që po shohim është rezultat i variantit të ri që u shfaq pak para Krishtlindjeve”, shtoi ai.
Të ballafaquar në fund të vitit me një shpërthim të kontaminimeve që i atribuohen një varianti më ngjitës të koronavirusit, autoritetet britanike kanë vendosur një kufizim më të rëndë në popullatë, me mbylljen e shkollave dhe shpresojnë ta heqin atë me fushatën aktuale të vaksinimit.
Objektivi i qeverisë është vaksinimi i të gjithë 70-vjeçarëve dhe personelit shëndetësor deri në mes të shkurtit, rreth 15 milionë persona.
Përballur me një rritje të konsiderueshme të të sëmurëve me koronavirusin e ri, spitalet britanike ndodhen nën një presion të madh, ndërkohë që disa gjenden si në zonë lufte, ngriti alarmin këshilltari shkencor i qeverisë, Patrick Vallance.
Situata është shumë shumë e keqe në këtë moment, me një presion të madh, dhe në disa raste, ajo ngjan si në një zonë lufte për njerëzit që duhet ta menaxhojnë”, deklaroi Patrick Vallance për Sky News.
