Komandanti i Komandës Strategjike të Shteteve të Bashkuara, admirali Charles Richard, ka bërë thirrje që udhëheqësit federalë t’i riimagjinojnë metodat e parandalimit të veprimeve agresive nga vendet rivale si Kina dhe Rusia, përfshirë mundësinë reale për luftë bërthamore.
Në një vlerësim të gjendjes gjeopolitike, admirali Richard paralajmëroi se Kina dhe Rusia kanë filluar që në mënyrë agresive t’i sfidojnë normat ndërkombëtare në mënyra që nuk janë parë që nga kulmi i Luftës së Ftohtë.
Për këtë paralajmërim, ai përmendi shtimin e rasteve të sulmeve kibernetike dhe kërcënimet në hapësirë si dhe investimet e këtyre shteteve në armë të avancuara, siç janë armët bërthamore, shkruan Fox News.
“Ekziston një mundësi reale që një krizë rajonale me Rusinë dhe Kinën të eskalojë shpejt në një konflikt ku do të përfshiheshin armët bërthamore, nëse ato besojnë se një humbje konvencionale do ta rrezikonte regjimin e shtetit”, tha Richard.
Sipas tij, veprimet e fundit të Kinës dhe Rusisë do ta rrisin rrezikun e krizës apo konfliktit mes fuqive të mëdha, nëse nuk ka kontroll nga zyrtarët amerikanë.
Ai theksoi disa hapa të nevojshëm për përmirësimin e gjendjes së gatishmërisë, përfshirë forcimin e fokusit në prokurimin e sistemeve të armatimit dhe kapaciteteve të tjera që do ta ruanin avantazhin strategjik amerikan ndaj rivalëve.
