Britania e Madhe regjistroi 1 052 të vdekur nga COVID-19, shifra më e lartë në pesë ditët e fundit, sipas të dhënave zyrtare.
Sipas të dhënave të fundit të qeverisë, në mbarë vendin janë zbuluar 12 364 raste të reja me koronavirus, duke e çuar numrin e përgjithshëm të tyre në 3 972 148.
Rastet e reja me COVID-19 të regjistruara gjatë shtatë ditëve të fundit, përkatësisht nga 3 shkurti deri më 9 shkurt, arritën në 119 525, shifër e cila është 26,6% më pak se periudha e mëparshme shtatë ditore.
Shifrat e fundit, më të ulëta në nëntë javët e fundit, tregojnë se numri i infeksioneve po shënon ulje të ndjeshme, përderisa vaksinimet dhe testimet vazhdojnë të rriten në mënyrë të qëndrueshme.
Në Britaninë e Madhe deri dje janë administruar 12 646 486 doza të vaksinës COVID-19, ndër të cilat 516 392 persona kanë marrë të dy dozat e nevojshme për t’u imunizuar.
Sot, qeveria britanike njoftoi rregulla të reja për personat që mbërrijnë në Britaninë e Madhe, ndërsa shkelësit e rregullave mund të përballen me një dënim me burgim 10-vjeçar dhe një gjobë deri në 10 mijë paund (rreth 13.500 dollarë).
Britania e Madhe është në luftë për të frenuar përhapjen e llojit të koronavirusit të Afrikës së Jugut, virus që është zbuluar në zona të shumta, përfshirë në qytetet e mëdha si në Londër dhe Liverpool.
Ndjesia e urgjencës u rrit më shumë pasi një studim zbuloi se vaksina Oxford-AstraZeneca është më pak se 10% efektive kundër llojit të ri të virusit.
