Kodi Zgjedhor, që u miratua në Komisionin e Ligjeve vetëm me votat e mazhorancës, e cila i qëndroi idesë së saj që koalicionet të garojnë me listë unike të përbashkët, ndonëse kjo kundërshtohet nga opozita jashtëparlamentare, pritet të kalojë sot në votim në seancë plenare.
Lajmi u dha që dje nga kryeministri Edi Rama, i cili nga selia e PS, bëri të qartë se nuk kërkon më kompromis me PD, por i interson vetëm të bëjë 84 vota.
“Nesër në parlament do të kalohet. Shumica kushtetuese është ajo që vendos në fund të ditës. Mjafton të marrë 84 vota dhe është ligj. Nuk e vë dot në diskutim askush”, tha ai.
Sipas tij, është pikë mazhoranca ajo që po lëshon nga ky proces.
“Në këtë proces kemi qenë shërbëtor të përulur të të tjerëve. E them me plot gojën. Kemi bërë atë që se ka bërë asnjë parti e madhe, as PD e as PS në gjithë këto vite, duke qenë shërbëtorë të një procesi ku përveç opozitës brenda parlamentit kemi shërbyer edhe për një opozitë tjetër jashtë parlamentit. Të gjithë kanë marrë më shumë, shumë më shumë se sa ne nga ky proces në sensin e asaj që kanë dashur.
Ne nuk kemi marrë çfarë kemi dashur nga ky proces dhe nuk ka në ligjin e ri elektoral asgjë që është aty sepse duam ne. Ka aty gjëra që janë sepse kështu e do opozita jashtë parlamentit apo brenda parlamentit, por je se duam ne. Ka një moment për t’i dhënë fund diskutimeve, aq më tepër që dy palët tërheqin nga vetja. Kjo s’mund të ndodhë”, tha Rama.
Deklarata e kryeministrit mori menjëherë përgjigje nga anëtarët e opozitës në Këshillin Politik, Oerd Bylykbashi dhe Petrit Vasili.
Sipas tyre, Rama po tenton të përçajë opozitën e bashkuar dhe se ka shkelur marrëveshjen e 5 qershorit duke ndryshuar rregullat e lojës ndërkohë që ajo ka nisur tashmë.
Ish deputeti i PD-së, tha se Rama nuk mund të ndryshojë rregullat e lojës 7 muaj para zgjedhjeve pasi cenon standardet e OSBE-së dhe Këshillit Europian, ndërsa në lidhje me koalicionet e përbëra, për Bylykbashin bie teza e Ramës se nuk ka asnjë model me lista të hapura dhe koalicione të përbëra, duke thënë se kështu e ka Italia që lejon koalicionet e përbëra në çdo nivel.
Sipas opozitës, edhe nëse kalon në Parlament, Rama e ka të siguruar humbjen e tij.
Amendamentet e miratuara më 2 tetor në komision sanksionuan vendosjen e pragut 1% për numrin minimal të votave që duhet të arrijnë subjektet zgjedhore për të përfituar nga shpërndarja e mandateve. Ky ishte një propozim i grupeve parlamentare të pakicës që u pranua nga mazhoranca.
Gjithashtu u vendos që koalicioni zgjedhor të parashikohet si subjekt zgjedhor që garon në zgjedhje. Në momentin e regjistrimit, koalicioni duhet të deklarojë partinë politike udhëheqëse të koalicionit. Marrëdhëniet midis partive pjesëtare të koalicionit dhe detyrimet reciproke midis tyre rregullohen në marrëveshjen e koalicionit, e cila është pjesë e dokumentacionit që depozitohet nga koalicioni në KQZ.
Tjetër ndryshim ishte detyrimi për ri-renditjen e pjesës së parë të listës që korrespondon me mandatet e fituara ashtu sikurse ri-rënditjen e pjesës së dytë të listës, bazuar mbi rezultatin e votave preferenciale. Edhe ky propozim u bë prej përfaqësuesve të mazhorancës në komision.
Përfaqësuesit e pakicës parlamentare kërkuan dhënien e të drejtës për kryetarin e partisë që garon e vetme ose për kryetarin e partisë udhëheqëse të koalicionit kur garojnë një grup partish, që të jetë në listën e 12 zonave zgjedhore njëkohësisht. Mazhoranca pranoi pjesërisht këtë propozim duke e kufizuar këtë të drejtë në vetëm 4 zona zgjedhore./Ora news/
