Arsenali u dha fund humbjeve të vazhdueshme nga Manchester City në të gjitha garat duke arritur të fitojë me penallti në sfidën për FA Community Shield.
Mikel Arteta e kishte mposhtur vetëm një herë ish-mentorin e tij, ndërsa në edicionin e kaluar mbeti prapa në garën për titullin e Ligës Premier, edhe pse Topçinjtë e kishin udhëhequr garën për pjesën më të madhe të sezonit.
City e fitoi edhe Kupën FA dhe Ligën e Kampionëve për ta kompletuar tripletën historike, mirëpo kjo ishte hera e tretë radhazi që humbte Community Shield.
Ky trofe ishte një mundësi e madhe për Arsenalit që të dëshmonte se mund të jetë konkurrent i fortë i kampionit në sezonin 2023/2024.
Sidoqoftë, në konferencën për shtyp, Guardiola i ka ngacmuar rivalët duke thënë: “I humbëm tre (Community Shields) radhazi! A e dini pse? I fituam tre Liga Premier!”.
