Kryeministri i Kosovës, Albin Kurti, sot ka dhënë një qëndrim më të zbutur për mbajtjen e zgjedhjeve të Serbisë në Kosovë.
Në konferencën e përbashkët për medie me kancelarin austriak Karl Nehammer, Kurti nuk është deklaruar i prerë për mos mbajtjen e këtyre zgjedhjeve në Kosovë.
Ai ka përmendur respektimin e Kushtetutës së Kosovës, derisa ka shtuar se institucionet e Kosovës nuk duam që t’ia pamundësojnë qytetarëve të Kosovës pjesëmarrjen në këto zgjedhje.
Kurti ka thënë se është optimist në rrugën përpara. “Nuk kemi diskutuar veçanërisht për çështjen e zgjedhjeve të 3 prillit që i organizon Serbia. Ne dëshirojmë që në Kosovë të respektohet Kushtetuta, ligji dhe rezoluta e 15 janarit të këtij viti. Ndërkaq, nuk duam që t’ia pengojmë, që t’ia pamundësojmë qytetarëve të Kosovës, që mund të kenë edhe pasaportë të Serbisë, të drejtën e votës. Jemi optimist për rrugën përpara. Mund të ketë ndokush që dëshiron destabilizimin, që dëshiron ekcese, incidente, mirëpo këtë nuk do ta gjeni në radhët e popullit të Kosovës dhe as institucioneve të Republikës”, ka deklaruar Kurti.
Ai ka mohuar çfarëdo mundësie të destabilizimit të situatës më 3 prill, duke thënë Kosova është e interesuar për paqe. “Jemi në kontakt të vazhdueshëm edhe me Brukselin, edhe me ambasadat e QUNT-it, me kryeqytet kryesore evropiane. Gjithashtu, me SHBA-të, dhe besojmë se nuk do të këtë e kurrfarë problemesh. Ata që do të mund të paramendojnë, ose larg qoftë edhe të tentojnë, nuk do të mund të kenë sukses. Dhe dita e 3 prillit nuk besoj se do të jetë ndryshe”, ka thënë Kurti.
Edhe kancelari austriak Karl Nehammer ka folur për mbajtjen e këtyre zgjedhjeve.
Ai ka përmendur rolin e OSBE-së që do të mund të ndihmonte në këtë proces. “Deri me 3 prill ka ende kohë, ne po i shohim problemet, po i trajtojmë problemet, duhet t’i zgjidhim problemet. Sepse ka institucione evropiane siç është OSBE-ja, prandaj, është e rëndësishme që ne, siç e tha kryeministri, të bëjmë gjithçka që ata të mos e kenë të lehtë të shkatërrojnë diçka që është ndërtuar deri tani”, ka deklaruar Nerhammer.
Kosova duhet të jetë pjesë BE-së
Kancelari i Austrisë, Karl Nehammer, ka dhënë mbështetjen e tij për anëtarësimin e Kosovës në Bashkim Evropian (BE).
Në konferencën për medie, ai ka thënë se Kosova duhet të jetë brenda Bashkimit Evropian, duke shtuar se për këtë do të angazhohet edhe personalisht. “Kemi lidhje historike me njëri-tjetrin dhe është e rëndësishme që edhe në të ardhmen të jemi të lidhur së bashku. Për këtë Kosova duhet të jetë brenda Bashkimit Evropian dhe për këtë duhen perspektiva të mëdha”, ka thënë Nehammer.
Sipas tij, procesi i anëtarësimit të Kosovës në BE duhet të përshpejtohet. “Edhe kryeministri e përmendi që Austria të jetë urë lidhëse me BE-në. Kemi zhvilluar biseda të mira se si mund të përshpejtojmë procesin, prandaj do të jetë e rëndësishme për ne që edhe Republikën Federale të Gjermanisë ta përfshijmë, sepse edhe ata janë miq të Kosovës që ta përshpejtojmë anëtarësimin në BE. Besoj që bashkë do t’ia dalim, sepse për Austrinë Ballkani Perëndimor është një pikë gjeostrategjike dhe gjeopolitike”, ka thënë Nehammer.
Ndërsa, kryeministri Albin Kurti ka kërkuar nga kancelari austriak mbështetjen për liberalizim të vizave.
“Nga kancelari kërkova që Austria të shtyjë përpara vendimin për liberalizim të vizave në Këshillin Evropian, pasi ky është vendim i vonuar që po i dëmton qytetarët, bizneset dhe ekonominë e Kosovës. Kosova duhet të përfitojë më shumë fonde nga BE-ja. Fondet e BE-së duhet të jenë të ndërlidhura me vlerat e BE-së”, ka deklaruar Kurti.
