Adoleshenti nga Florida, i cili i kërkoi Elon Muskut 50 mijë dollarë në mënyrë që të ndalojë së publikuari në Twitter vendndodhjen e aeroplanit privat të miliarderit, ka thënë se ai po krijon dhjetëra llogari të tjera që ndjekin lëvizjet e njerëzve të tjerë të pasur dhe të famshëm.
Jack Sweeney, një student kolegji 19-vjeçar dhe entuziast i aviacionit, tha se kishte krijuar 16 llogari të automatizuara në Twitter, ose robotë, të ngjashëm me @ElonJet për të ndjekur aeroplanët në pronësi të bashkë-themeluesit të Microsoft, Bill Gates (@GatesJet), Jeff Bezos i Amazon, sipërmarrësi miliarder Mark Cuban dhe reperi Drake.
Në një intervistë me theguardian, Sweeney tha se ai kishte krijuar gjithashtu një ueb-faqe, Ground Control, për të “monetarizuar” shërbimin duke ofruar shërbime gjurmimi të personalizuara për superfansit e të famshmëve dhe për të pritur versione në internet të robotëve të Twitterit nëse faqja e mikroblogimit mbyll llogaritë e tij për shkak të shqetësimeve të privatësisë të ngritura nga subjektet, transmeton telegrafi.
“Ata janë ose njerëz vërtet të shquar ose thjesht janë shumë interesantë”, tha Sweeney për njerëzit që ai ndjek. “Kohët e fundit kam shtuar njerëz që [ndjekësit e tij] kanë kërkuar”, pohoi ai.
Llogaritë e fundit që ai ka krijuar pas kërkesave përfshijnë Cuban dhe Drake, të cilët ai tha se ishin më interesantët.
“Ai ka aeroplanin më të madh nga të gjithë, është një Boeing gjigant”, pohoi djaloshi.
Aeroplani i reperit, Air Drake, është një Boeing 767-200ER i gjatë 185 milionë dollarë, i gjatë 59 këmbë që mund të transportojë 216 pasagjerë.
Sweeney, i cili krijoi @ElonJet në qershor 2020, tha se shpresonte që Musk të rihapte negociatat për të blerë dhe mbyllur llogarinë. Bashkëthemeluesi dhe shefi ekzekutiv i Tesla ka refuzuar kërkesën e adoleshentit për 50 mijë dollarë.
