Struktura e Posaçme Antikorrupsion i ka dorëzuar Policisë urdhër-arrestin për ish-zëvendëskryeministrin Arben Ahmetaj.
Ndërkaq, disa ditë më parë, urdhër-kontrollet e firmosura nga Gjykata e Posaçme pas kërkesës së SPAK mbi çështjen Ahmetaj bënë që anëtarë të BKH-së të zbarkojnë në banesat e personave të dyshuar në këtë aferë, mes tyre familjarë të ish-zëvendëskryeministrit.
SPAK mësohet të ketë marrë edhe mandatin e arrestit për Ahmetajn, edhe pse ai ndodhet jashtë Shqipërisë. Nga ana e Prokurorisë së Posaçme nuk është dhënë asnjë detaj zyrtar i operacionit, por mësohet se në të njëjtën çështje janë vënë nën hetim edhe disa persona të tjerë , ish bashkëpunëtorë e biznesmenë.
Kujtojmë se më 14 korrik, Kuvendi i hapi rrugën arrestimit të Ahmetajt dhe kontrollit të banesës së tij, duke votuar pro kërkesës së SPAK. Ahmetaj ndodhet jashtë Shqipërisë, ndërsa në një reagim para seancës së Kuvendit, ai tha se largimi i tij lidhej me arsye “serioze” familjare, duke theksuar se do të “luftojë” për të vërtetën.
Hetimi ndaj Ahmetajt dhe kërkesa e SPAK
Ahmetaj akuzohet për korrupsion pasiv në 6 raste, fshehje pasurie dhe pastrim të produkteve të veprës penale. Hetimi për ish zëvendës kryeministrin Arben Ahmetaj ka përfshirë edhe bisedat telefonike të tij të para 11 viteve.
Nga këqyrja e tyre rezultoi se nga data 21 korrik 2012 deri në 10 tetor 2012, pra në gati tre muaj, të ketë patur 138 komunikime telefonike dhe 3287 mesazhe mes Ahmetaj dhe Mirel Mërtirit.
Më pas SPAK thotë se janë faktuar edhe lidhjet mes Ahmetajt dhe Klodian Zotos, biznesmenit të inceneratorëve.
Sipas hetimeve rezulton që ai të ketë përfituar rreth 500 mijë euro përfitime të nisura që nga viti 2016 deri më 2020. SPAK ka arritur të zbulojë edhe shkëmbime e-mailesh kur Zoto informohej mbi procedurat për inceneratorët.
