Me vendim të presidentit të Afganistanit, Ashraf Ghani, është formuar Ministria e Paqes, me qëllim të përshpejtimit të bisedimeve paqësore me talebanët, raporton Anadolu. Vendimi u miratua edhe nga parlamenti, ndërsa në Kabul u mbajt takimi i parë për të diskutuar procesin e paqes.
Zëvendësministri për Paqen, Ghulam Yahya Abassi tha në takim se ministria do të punojë për të bashkuar të gjitha organizatat dhe institucionet për t’u konsultuar dhe koordinuar më mirë bisedimet e paqes.
Ai tha se përvojat e Këshillit Suprem të Paqes do të ndihmojnë për të arritur paqen me talebanët. Abassi theksoi se do të punojë seriozisht për fillimin e bisedimeve të paqes me talebanët. Këshilli i Lartë i Paqes në Afganistan u themelua në vitin 2010 nga ish-presidenti Hamid Karzai.
Talebanët kontrollojnë zona në shumë pjesë të Afganistanit. Përkundër faktit se brenda këtyre kornizave është krijuar një Këshill Paqeje, nuk janë arritur rezultate konkrete.
