Vinicius Junior është i vendosur që ta ndihmojë Kylian Mbappe që ta fitojë Këpucën e Artë të La Ligas, me yllin e Real Madridit që reflektoi edhe mbi Topin e Artë.
Reprezentuesi brazilian ka dëshmuar kualitetin e tij në ‘Santiago Bernabeu’, duke regjistruar mbi 100 gola të shënuar për ‘Los Blancos’ teksa i ka ndihmuar ata të fitojnë tre tituj në Spanjë si dhe Ligën e Kampionëve.
Ai është kaq i rëndësishëm për gjigantin spanjoll sa që Mbappe u detyrua ta ndryshojë pozicionin e tij pasi mbërriti në kryeqytetin spanjoll.
Prezenca e Vinicius në krahun e majtë do të thotë se Mbappe po operon si sulmues qendror. Iu desh një kohë e konsiderueshme që francezi të mësohej me kërkesat e atij roli, por ai tashmë ka numëron 19 gola këtë sezon, ku 12 prej tyre kanë ardhur në La Liga.
Mbappe gjendet vetëm katër gola mbrapa Lewandowskit i cili është golashënuesi më i mirë deri më tani, por Vinicius ka thënë se do të bëjë përpjekje maksimale për ta ndihmuar Mbappen ta fitojë Pichichin.
“Ne (Mbappe dhe Rodrygo) jemi të tre sulmuesit, ne e kemi obligim që të shënojmë gola, të dhurojmë asistime dhe e vërteta është se ne jemi të gjithë të lumtur me Kylian”.
“Fillimet janë gjithmonë të vështira, por ai është përshtatur mirë dhe Kylian është një lojtar i madh dhe edhe kur ai ishte duke u përshtatur, ka shënuar shumë gola”.
“Rodrygo dhe unë do të bëjmë gjithçka që ta bëjmë atë golashënuesin më të mirë në të gjitha garat, sepse ai ka ardhur këtu për këtë arsye”, ka thënë Vinicius.
Real Madridi qëndron në krye të La Ligas pas 20 xhirove të zhvilluara dhe nesër (e shtunë) do ta zhvillojnë ndeshjen e radhës në udhëtim ndaj Real Valladolid.
