T’i bashkohesh akuzës së Edi Ramës se të gjithë qytetarët që marrin pjesë në protestën kundër rritjes së çmimeve janë pro luftës së Putinit që po vret qytetarë të pafajshëm dhe po gjymton shpirtra fëmijësh, do të thotë se je i/e spiropalizuar në katror, pasi përdor dhimbjen e njerëzve të pafajshëm për të përligjur dhimbjen që Edi Rama i shkakton popullit të tij.
Askush që i thotë vetes njeri nuk mund t’i gëzohet një lufte dhe madje, as ta mbështesë atë. As kosovarët që e kanë provuar në vetë të parë traumën e luftës nuk e mbështesin Putinin, ndonëse Ukraina nuk e njeh pavarësinë e Kosovës. Pse nuk e mbështesin?!
Sepse vdekja e ukrainasve nuk i risjell në jetë viktimat e genocidit serb dhe as e shuan dhimbjen e shpirtrave të mbetur gjallë në Kosovë. Të ngrihesh e të akuzosh e të etiketosh shqiptarët që janë në vështirësi të skajshme ekonomike se mbështesin Putinin do të thotë se je i/e spiropalizuar në katror.
Ai shesh është Ukraina në Shqipëri. Nëse ukrainasit po largohen nga vendi i tyre nga lufta, shqiptarët po largohen nga Shqipëria nga skamja, nga pasiguria dhe nga mungesa e drejtësisë në vend.
Askund nuk gjendet e drejta, meritokracia, apo mirëqenia dhe njeriu ndihet aq i lodhur sa bën gati valixhet dhe zhduket nga sytë këmbët, pasi i duket vetja shumë i vogël përballë poshtërsisë dhe perversitetit të sektit rilindas. 500.000 shqiptarë të larguar për tetë vite.
Përtej skamjes për një pjesë, është edhe pasiguria për të rritur fëmijët në këtë vend nga ana tjetër. Tragjikja është se nuk bëjnë gati valixhet veç të papunët, por edhe ata individë që mund të kenë një standard krejt të rehatshëm ekonomik, por nuk duan t’i rrisin fëmijët në këtë moçal. Kanë frikë se ingranazhi i këtij moçali do të gëlltisë fëmijët e tyre dhe detyrohen të lënë gjithçka kanë në këtë vend, për të rifilluar jetën diku gjetkë.
Prindër që përcjellin fëmijët e tyre në aeroporte sa të mbushin 18 vjeç. Prindër që u thonë fëmijëve: Ik e mos u kthe! Ndërto jetën tënde atje. Mos e kthe kokën prapa.!
Prindër që futen në kredi për t’u mundësuar arsimimin fëmijëve në Evropë. Prindër që punojnë nga mëngjesi në darkë për t’i mbajtur larg fëmijët nga ky vend.
Disa kohë më pare dentisti im më tha: E largova tim bir nga ky vend, sepse do të ishte i paaftë të ndërtonte jetën e tij këtu. E kam mësuar të mos gënjejë e të mos mashtrojë kënd. Sapo i dhurova një qytetar Evropës dhe sapo humba mundësinë për të jetuar pranë tim biri.
Post Scriptum- E pra, ti grua dhe ti burrë që protestuesit i quan pro Putinit, nuk je gjë tjetër veçse një qënie e spiropalizuar në katror dhe një qënie e spiropalizuar në katror meriton veçse shprehjen e Senekës e cila në ligjëratë të drejtë thotë: Ka shumë njerëz të gjallë të cilët meritojnë që në portën e shtëpisë t’u shkruash- Ky njeri ka vdekur prej kohësh.
