Një aksident i rëndë është regjistruar pasditen e kësaj të shtune (17 qershor) në Elbasan, ku për pasojë ka humbur jetën një fëmijë 8 vjeç, ndërsa kanë mbetur të plagosur 5 persona. Nëpërmjet një njoftimi për mediat, Policia bën me dije se aksidenti u regjistrua rreth orës 16:30, në aksin rrugor Elbasan-Peqin, në fshatin Paulesh.
Në ngjarje u përfshinë dy automjete, ku një makinë tip “Golf”, e drejtuar nga shtetasja me inicialet T. B., është përplasur me automjetin me drejtues shtetasin A. H., banues në Kavajë.
Si pasojë e aksidentit ka ndërruar jetë 8-vjeçarja, pasagjere në automjetin tip “Golf”, ndërsa janë plagosur edhe drejtuesja e automjetit dhe vajza e saj e 11 vjeçe. Ato janë dërguar në spital ku ndodhen jashtë rrezikut për jetën
Po ashtu kanë pësuar lëndime edhe drejtuesi i automjetit tjetër dhe 2 pasagjerët që po udhëtonin me të, të cilët ndodhen në spital jashtë rrezikut për jetën
Nuk dihen ende shkaqet e aksidentit, ndërsa Policia bën me dije se grupi hetimor ndodhet në vendngjarje dhe po punon për zbardhjen e rrethanave të aksidentit.
