Një aksident tragjik i ndodhur mbrëmjen e 24 gushtit në aksin rrugor Delvinë–Sarandë u mori jetën dy motrave të reja, Elvisa dhe Rozina Dhimaku, përkatësisht 22 dhe 20 vjeçe.
Vajzat po udhëtonin me automjetin e tyre tip “Lancia” nga Delvina në drejtim të Sarandës, kur një makinë tip “Audi” u përplas me to në mënyrë frontale.
Mjeti “Audi” drejtohej nga 24-vjeçari Kevi Norra, i cili punon si specialist në Ministrinë e Brendshme. Ai po udhëtonte në drejtim të Gjirokastrës dhe dyshohet se ka tentuar një parakalim të gabuar, duke hyrë në korsinë e kundërt, çka çoi në përplasjen fatale “kokë më kokë” mes dy makinave.
Përplasja ishte aq e fortë sa automjetet u shkatërruan plotësisht, ndërsa njëra prej tyre mbeti e përmbysur në rrugë.
Si pasojë, motrat Dhimaku humbën jetën në vendin e ngjarjes. Një tjetër pasagjere në mjetin e tyre, 24-vjeçarja Antonela Zhupa, mbeti e plagosur por ndodhet jashtë rrezikut për jetën.
Kevi Norra rezultoi në gjendje të dehur në momentin e aksidentit. Policia e Sarandës njoftoi se testi i parë i alkoolit tregoi nivelin 1.52 mg/l, ndërsa testi i dytë 1.42 mg/l. Ai u arrestua në flagrancë dhe akuzohet për “Shkelje të rregullave të qarkullimit rrugor” dhe “Drejtim i automjetit në mënyrë të parregullt”.
20-vjeçarja Rozina Dhimaku, ishte studente për Mjekësi.
Tragjedia ka tronditur opinionin publik dhe ka rikthyer vëmendjen tek problemet e sigurisë rrugore në vend.
