Një oficer policie është në gjendje kritike pas një aksidenti midis automjeteve të policisë të përfshira në një autokolonë për zëvendëspresidentin JD Vance në Tennessee.
Mediat ndërkombëtare bëjnë të ditur se aksidenti ndodhi rreth orës 6:11 të mbrëmjes më 14 nëntor në Maryville, Tennessee, rreth 17 milje nga qendra e Knoxville, kur një motoçikletë e policisë në Maryville dhe një SUV i Patrullës së Autostradës së Tennessee-t u përplasën.
Sipas departamentit të policisë, oficeri i plagosur rëndë i identifikuar si Justin Broën, ishte pjesë e ekipit që shoqëronte numrin dy të qeverisë amerikane. Ai po ngiste motoçikletën kur u përplas me një SUV policie.
Pas përplasjes, një grup qytetarësh filluan menjëherë të jepnin ndihmë dhe “luajtën një rol kritik në shpëtimin e jetës së oficerit”, tha departamenti. Broën u dërgua në Qendrën Mjekësore të Universitetit të Tenesit.
“Për ata individë, reagimi i shpejtë i të cilëve i shpëtoi jetën FTO Broën mbrëmë, ne nuk mund t’ju falënderojmë kurrë mjaftueshëm. Ju jeni heronj të vërtetë”, tha Shefi Tony Crisp në një deklaratë më 15 nëntor.
Broën mbeti në gjendje kritike me lëndime të rënda, që nga pasditja e 15 nëntorit dhe iu nënshtrua një ndërhyrjeje kirurgjikale më herët gjatë ditës, tha departamenti i policisë në një përditësim.
