Aktori i njohur japonezo-amerikan Cary-Hiroyuki Tagawa, i cili u bë ikonë për publikun me rolin e magjistarit të errët Shang Tsung në filmin “Mortal Kombat” të vitit 1995, ka ndërruar jetë në moshën 75-vjeçare.
Lajmi u konfirmua nga familja e tij, e cila bëri të ditur se aktori ndërroi jetë të enjten në Santa Barbara, i rrethuar nga fëmijët, si pasojë e komplikimeve nga një goditje në tru.
Tagawa lindi në Tokio, nga një nënë aktore e skenës Takarazuka dhe një baba ushtarak japonezo-amerikan që shërbente në Ushtrinë e Shteteve të Bashkuara. Qysh i vogël u transferua në SHBA, ku u ekspozua ndaj kulturave të ndryshme dhe u trajnuar në arte marciale, një pasion që e shoqëroi gjatë gjithë jetës.
Hapat e tij të parë në kinemanë hollivudiane i hodhi në vitet ’80, fillimisht me një rol të vogël në komedinë e John Carpenter, “Big Trouble in Little China”. Por fama erdhi me interpretimin e tij në “The Last Emperor” të Bernardo Bertolucci-t, ku luajti rolin e eunukut Chang. Ky sukses i hapi dyert për role të tjera të rëndësishme, si në “License to Kill”, “Rising Sun”, “Pearl Harbor”, “Memoirs of a Geisha” dhe serialin e Amazon “The Man in the High Castle”.
Roli i Shang Tsung mbetet ndoshta më i paharrueshmi për fansat. Tagawa fitoi menjëherë ekipin krijues duke u paraqitur në audicion me kostum të plotë dhe energji mbresëlënëse, që e bëri personazhin të jetojë për dekada në film, seriale dhe videolojëra.
Ai ishte i martuar me bashkëshorten e tij, Sally, me të cilën kishte tre fëmijë. Në vitet e fundit ai u konvertua në besimin ortodoks dhe fitoi edhe shtetësinë ruse.
Cary-Hiroyuki Tagawa do të mbahet mend si një aktor karizmatik, me një karrierë të gjatë dhe të larmishme, që la gjurmë të pashlyeshme në kinemanë botërore.
