Shkëlqimi i ceremonisë së 98-të të “Academy Awards”, këtë vit pati edhe momente krenarie për vendin tonë.
Aktorja me origjinë shqiptare, Luana Bajrami, është ngjitur në majat e kinematografisë botërore, duke u bërë pjesë e historisë së çmimeve Oscar.
Në një moment të rrallë dhe të pazakontë për këtë kategori, çmimi “Live Action” u nda mes dy fituesve. Mes tyre, triumfoi filmi me metrazh të shkurtër “Two People Exchanging Saliva”, ku Bajrami shkëlqen në rolin kryesor.
E vendosur në një Paris të “pazakontë”, ku dashuria është nën pranga dhe puthjet konsiderohen krim i rëndë, Luana interpreton personazhin e Malaise.
Një rrëfim absurd mbi lirinë dhe ndëshkimin.
E lindur në Kosovë dhe e rritur në Francë, Bajrami nuk është më një emër i panjohur. Pas suksesit me “Portrait of a Lady on Fire” dhe debutimit si regjisore në Kanë me “Luaneshat e Kodrës”, ky Oscar e shndërron atë zyrtarisht në një nga talentet më premtuese të gjeneratës së re në Evropë.
