Shqipëria është duke kryer të gjitha detyrat e nevojshme në kuadër të Kryesisë e OSBE-së në vitin 2020.
Ministri në detyrë për Europën dhe Punët e Jashtme, Gent Cakaj, në kuadër të mbledhjeve të shumta në New York, takoi edhe njëherë Sekretarin e Përgjithshëm të OSBE-së, Thomas Greminger.
Në takim u diskutua veçanërisht për gamën e përgatitjeve teknike dhe politike të Shqipërisë për të marrë Kryesinë e OSBE-së në vitin 2020.
“Gjykuar nga këndvështrimi organizativ, Shqipëria është duke kryer të gjitha detyrat e nevojshme nëpërmes Taskforcës së ngritur në Ministrinë për Europën dhe Punët e Jashtme dhe Misionin e saj në Vjenë, në bashkërendim të plotë me vendet pjesëmarrëse. Po ashtu, krahas ndihmës së madhe të asistencës ndërkombëtare që i është bashkangjitur skuadrës shqiptare, diplomatët shqiptarë të angazhuar në çështjet e OSBE-së i janë nënshtruar ushtrimeve të veçanta”, u shpreh Cakaj.
“Gjykuar nga këndvështrimi politik, Shqipëria ka paraqitur prioritetet fillestare të Kryesisë së saj që shtrihen në të gjitha dimensionet e angazhimeve të OSBE-së, ushtarake-politike, ekonomiko-mjedisore dhe të drejtat themelore të njeriut”, theksoi ai.
Po ashtu, shtoi Cakaj, “si kryesuese e tanishme e Grupit të Mesdheut, Shqipëria është duke përmbyllur të gjitha detyrimet e saj për të pasur një konferencë dinjitoze në muajin tetor në Tiranë”./ATSH/
