Në raportin e KLSH pritet të dalin emrat e inspektorëve, drejtorëve dhe të gjithë atyre që kanë abuzuar me sigurinë ushqimore
Një skandal në shkallë të gjerë pritet të dalë për Autoritetin Kombëtar të Ushqimit në Shqipëri. Si një institucion që supozohet të sigurojë qytetarët që çfarë hanë e pinë shkon paralel me shëndetin e mirë të tyre, AKU duket se ka bërë totalisht të kundërtën.
Qendra Alert ka siguruar raportin paraprak nga Kontrolli i Lartë i Shtetit që pritet të nxjerrë në shesh skandalet korruptive të këtij Autoriteti.
Në mesin e skandaleve në të cilat institucioni është përfshirë është ajo e vezëve pas ngordhjes së shpendëve në disa stabilimente, tregtimit të vezëye të Klasit B për konsum tavoline, si dhe mosbërja e inspektimeve, kontrolleve dhe bllokimeve të bizneseve që kanë shkelur rregullat.
Alert bën të ditur gjithashtu se kanë munguar kitet nga Instituti i Sigurisë Ushqimore dhe Veterinarisë për të kryer analizat CPR.
Në raportin paraprak të KLSH, bëhet fjalë për një hetim të periudhës kohore nga 1 janari i vitit 2020 deri në 31 dhjetor të 2022. Në hulumtimin e bërë dalin hapur faljet e gjobave shumëmilionëshe të AKU ndaj subjekteve që kanë pasur parregullsi.
Tjetër skandal nga ky Autoritet, ka të bëjë me emërimin e drejtorëve, inspektorëve apo kryeinspektorëve që nuk kanë arsimin përkatës për këtë fushë. Në raportin e KLSH pritet të dalin të gjitha parregullësitë, emrat e inspektorëve, drejtorëve dhe të gjithë atyre që kanë abuzuar me sigurinë ushqimore të qytetarëve shqiptarë.
