Ish-presidenti i FIFA-s, Sepp Blatter dhe ish-zv.presidenti Michel Platini janë shpallur të pafajshëm në gjyqin për korrupsion.
Ata përballeshin me akuzat e prokurorëve për pagesën e paligjshme të afro 2 milionë e 100 mijë dollarëve nga FIFA në xhepat e Platini, në vitin 2011.
Ai skandal i dha fund mbretërimit 17-vjeçar të Blatter në krye të FIFA-s. Me shkarkimin e paevitueshëm nga kreu i futbollit botëror, 86-vjeçari përfshiu në skandal edhe Platini, duke ndërprerë çdo shpresë të ish-legjendës franceze që ta pasonte në detyrë. Pas hetimit 6-vjeçar, Blatter u akuzua për “mashtrim, shpërdorim të detyrës, keqmenaxhim kriminal, si edhe për falsifikim dokumenti”.
Blatter u shpreh kështu para se të jepej vendimi: “Nuk jam shenjtor, por në këtë rast jam i pafajshëm”.
