Gjykata e Posaçme kundër Korrupsionit dhe Krimit të Organizuar, pasi SPAK përcaktoi masën e sigurisë “detyrim paraqitje” dhe bllokim të pasaportës duke caktuar masën “Ndalim i i daljes jashtë shtetit”, ka përcaktuar seancë për marrjen në pyetje të ish-ministrit të Shëndetësisë, Ilir Beqaj.
Mësohet se seanca e marrjes në pyetje, është caktuar të hënë më datë 20 nëntor në orën 12:00.
“Prokuroria e Posaçme kundër Korrupsionit dhe Krimit të Organizuar më datë 18.11.2023 ka paraqitur përpara Gjykatës kërkesën me objekt: Marrjen në pyetje të personin hetim I.B. Bazuar në nenin 248 të K.Pr.Penale seanca gjyqësore për zhvillimin e seancës gjyqësore për verifikimin e kushteve të zbatimit të masës dhe marrjen në pyetje të personit nën hetim I.B do të zhvillohet më datë 20.11.2023 ora 12:00”, thuhet në njoftim.
Kujtojmë se Prokuroria e Posaçme Kundër Korrupsionit dhe Krimit të Organizuar ka caktuar masën e sigurisë “detyrim paraqitje” ndaj ish-ministrit të Shëndetësisë, i cili është në hetim për dosjen “Sterilizimi”.
SPAK po ashtu i ka bllokuar pasaportën duke caktuar masën “Ndalim i i daljes jashtë shtetit”, si edhe është urdhëruar të paraqitet para policisë gjyqësore të Byrosë Kombëtare të Hetimit, një herë në javë, ditë të premte, ora 15.30.
Ilir Beqaj akuzohet për veprat penale të “Shpërdorimi i detyrës” në bashkëpunim dhe “Shkelja e barazisë së pjesëmarrëve në tendera apo ankande publike” kryer në bashkëpunim dhe “Korrupsioni pasiv i funksionarëve të lartë shtetëror ose i të zgjedhurve vendorë” në lidhje me procedurën e dhënies së koncesionit të sterilizimit në periudhën kur ishte ministër i Shëndetësisë.
Kontrata origjinale që i ka hapur rrugë këtij koncesioni është firmosur në 10 dhjetor 2015 mes Ministrisë së Shëndetësisë të përfaqësuar nga ministri i kohës, Ilir Beqaj dhe administratori i kompanisë “SaniService”, Admir Daca.
Ndërkohë në pranga për “Sterilizimin” kanë rënë biznesmeni, Ilir Rrapaj, i cili fitoi koncesionin dhe ish-zv/ministri i Shëndetësisë, Klodian Rjepaj.
