Shqetësimet po rriten në Mbretërinë e Bashkuar se të ardhurat prej 2.3 miliardë paundësh (rreth 2.7 miliardë euro) nga shitja e Chelsea-t, të cilat janë ngrirë për gati tre vjet, nuk mund të arrijnë kurrë te viktimat e luftës në Ukrainë për shkak të një mosmarrëveshjeje midis qeverisë dhe Roman Abramovich-it.
Siç raportohet nga “The Times”, qeveria pranoi në një deklaratë të ri se mosmarrëveshja është një “çështje komplekse ligjore” dhe vonesa ngre pyetje se çfarë do të ndodhë me paratë nëse Abramovich-i, ish-pronari i Chelsea-t, refuzon të tërhiqet, ose nëse ka një marrëveshje paqeje midis Ukrainës dhe Rusisë dhe sanksionet hiqen.
Richard Caborn, ish-ministri i sportit, i ka shkruar Keir Starmer-it duke i bërë thirrje kryeministrit të ndërhyjë në këtë rast.
Qeveria laburiste ka ndjekur paraardhësin e saj konservator duke këmbëngulur se do të autorizojë vetëm lirimin e 2 miliardë paundëve për projektet humanitare brenda Ukrainës, ndërsa Abramovich-i është i vendosur që fondet do të shpenzohen gjithashtu për viktimat e luftës jashtë Ukrainës.
Është sugjeruar se qeveria mund të ndërmarrë veprime ligjore kundër Abramovich-it, por kjo mund të çojë në vonesa të mëtejshme.
Në një deklaratë për “The Times”, Zyra për Zbatimin e Sanksioneve Financiare tha: “Kjo është një çështje ligjore komplekse, por Mbretëria e Bashkuar po punon me partnerë ndërkombëtarë, është angazhuar me ekipin e Abramovich-it dhe po shqyrton të gjitha opsionet për të siguruar që të ardhurat të arrijnë njerëzit e cenueshëm në Ukrainë që kanë më shumë nevojë”.
“Ne jemi të vendosur t’i çojmë të ardhurat për kauzat humanitare në Ukrainë, po bëjmë që kjo të ndodhë sa më shpejt që të jetë e mundur”, vijonte deklarata.
Në maj 2022, qeveria konfirmoi se të ardhurat neto nga shitja e Chelsea-t do të transferoheshin në një llogari bankare të ngrirë në Mbretërinë e Bashkuar që i përket kompanisë Holding të Abramovich-it “Fordstam Ltd”.
Miliarderi me origjinë ruse mbetet personi me kontroll të konsiderueshëm të kompanisë pavarësisht se është sanksionuar së bashku me oligarkë të tjerë pas pushtimit të Ukrainës.
Abramovich-i nënshkroi një “betim” duke premtuar se do t’i dhuronte të ardhurat nga shitja e Chelsea-t për një bamirësi “për të ndihmuar viktimat e luftës në Ukrainë”.
Tani duket e qartë se nuk kishte asnjë mekanizëm për ta detyruar Abramoviçin-in të lirojë paratë dhe mund të jetë e vështirë për dikë me lidhje kaq të ngushta me Vladimir Putin-in të lejojë vetëm Ukrainën të përfitojë nga fondet.
Për më tepër, duket se ka pasiguri të konsiderueshme në lidhje me atë që mund të ndodhë me paratë nëse do të ishin ende në llogarinë bankare të “Fordstam” dhe do të deklarohej paqja, me heqjen e sanksioneve.
