Aleanca për Shqiptarët ka reaguar për vdekjen e 22 vjeçarit në burgun e Kumanovës. Nga kjo parti kërkojnë dorëheqjen e ministres së Drejtësisë, drejtorit dhe zëvendës drejtorit të burgut si dhe kërkojmë përgjegjësi penale dhe morale për këtë rast.
“Aleanca për Shqiptarët të hidhur nga rasti kërkon përgjegjësi të plotë nga organet kompetente, dhe personat përgjegjës të cilët duhej t’i jepnin ndihmën e parë të riut. Në rrethana të tilla, dikush patjetër që duhet të merr përgjegjësi dhe publikisht të tregojë arsyen e vdekjes. Burgu nuk guxon të jetë stacioni i fundit i askujt, e aq më pak i një të riu që ndodhej aty për t’u resocializuar dhe reintegruar që nesër, po kjo shoqëri t’i ofrojë jetë dhe jo vdekje”, thuhet mes tjerash në reagimin e Aleancës për Shqiptarët.
Ndryshe, 22 vjeçari i cili ndërroi jetë mbrëmë në burgun e Kumanovës, dyshohet të ketë tepruar me përdorimin e pilulave qetësuese. Kështu thonë familjarët, të cilët ankohen edhe për trajtimin mjekësor në këtë burg. I ndjeri para 10 ditësh ishte transferuar nga Ohri ku po vuante dënimin për 1 vjet./Alsat/
