Kryetari i Bashkimit Demokratik për Integrim (BDI), Ali Ahmeti, është deklaruar në mbështetje të protestës së paralajmëruar për nesër në Tiranë, e cila organizohet për t’i bërë thirrje për drejtësi për ish-krerët e Ushtrisë Çlirimtare të Kosovës (UÇK) që po gjykohen nga Gjykata Speciale në Hagë.
Ahmeti theksoi dimensionin kombëtar të kësaj proteste, duke deklaruar se të gjithë aktivitetet e partisë janë ngrirë për shkak të saj.
“Të gjithë jemi UÇK, dhe nuk është protestë që na bashkon ndonjë grupacion, por protestë që na bashkon Ushtria Çlirimtare e Kosovës, për ta ngrit zërin të gjithë kundër kësaj padrejtësie të madhe që i bëhet Ushtrisë sonë,” u shpreh ai në një intervistë për T7.
Kreu i BDI-së denoncoi ashpër procesin gjyqësor në Hagë, duke e cilësuar atë si një padrejtësi të madhe dhe një devijim të lëndës.
Sipas Ahmetit, prokuroria në Hagë e ka devijuar çështjen, duke e kthyer atë në një lëndë “të sajuar nga njerëz me qëllim të keq” dhe të motivuar nga shërbimet sekrete serbe. Ai akuzoi se gjyqi ka ndërruar akuzë për “raste të paqena të trilluara nga dëshmitarë interesxhinj dhe shpifës”.
Ahmeti dërgoi një mesazh të qartë për Tribunalin: “UÇK nuk është ndërmarrje kriminale, por organizatë çlirimtare.”
I pyetur nëse një protestë e ngjashme do të organizohet edhe në Shkup, Ahmeti u përgjigj se kjo është “çështje kohe”, duke shtuar se po bisedohet me veteranët e Ushtrisë Çlirimtare Kombëtare (UÇK) në Maqedoninë e Veriut, të cilët janë në kontakt me shoqatat e veteranëve të luftës në Kosovë.
