Ambasada e re do të përmbajë përparësitë e një arkitekture moderne kundrejt asaj ekzistuese që do të shembet në rrugën Ismail Qemali, përballë RTSH në Tiranë, pasi nuk i përmbush më nevojat funksionale por edhe estetike.
Është studioja projektuese ARS dhe arkitekti Italian, Danielle Fanciullaci që kanë paraqitur sot në Universitetin Politeknik të Tiranës pas një viti që kur u hodh ideja po aty për godinën e re, por që tani kanë arritur ta konfigurojnë pamjen e ambasadës së re të Italisë në vendin tonë, që do të përmbledhë ambasadë, konsullatë, Institutin Italian të kulturës në një hapësirë të vetme.
“Morën pjesë 28 studio ndërkombëtare në garë. Pamë projekte shumë të bukura nga të gjithë. Donim që projekti të paraqiste më të mirën e Italisë, të gjurmëve të historisë së arkitekturës italiane në Shqipëri, në Tiranë, të ishte një simbol i tyre, të ishte një pikë referimi për qytetin, se do t’iu përkasë italianëve edhe publikut mbarë shqiptar. Dhe do të jetë një seli me hapësirë për të gjithë, ku mund të çelen ekspozita, do ketë bare ku të konsumojmë së bashku një kafe, do të ketë hapësira publike për t’u bashkuar shqiptarë dhe italianë” thotë arkitekti.
“Ne e përballuam garën me idenë se si të kombinojmë një ndërtesë funksionale, solide, të sigurt, të hapur dhe transparente, të disponueshme, shoqëruese, që të pasqyronte edhe mijëra vite që lidhin Italinë dhe Shqipërinë. Duke futur edhe shpirtin e vendit ku gjendet. Të ruajë sensin e bukurisë dhe qetësisë. Na u desh të futeshim në brendësi të oborrit për të krijuar një trotuar, një pedonale që publiku t’i afrohet ambasadës. Përdorimi I materialeve, rifiniturave do të kujtojë arkitekturën italiane, por përzier edhe me trashëgiminë shqiptare. Kemi projektuar një ndërtesë mesdhetare prej 3 katesh, dy ndërtesa të ndara nga një hyrje, me një konsum të ulët energjie me panele diellore e material të tjera në respekt të mjedisit dhe me mbrojtje sizmike” tha arkitekti.
Për realizimin e kësaj godine puna fillon që sot e parashikohet të zgjasë tri vite.
