Ambasadori amerikan në Serbi, Anthony Godfrey, tha se ndryshimi i administratës amerikane nuk do të ndikojë në zbatimin e Marrëveshjes së Uashingtonit, u njoftua sot nga Kuvendi i Serbisë, ku Ambasadori u takua me Kryetarin e Komisionit të Punëve të Jashtme, Zarko Obradovic.
Kështu po raportojnë mediat serbe, ku thuhet se sipas deklaratës, Godfrey theksoi se interesi i Shteteve të Bashkuara është anëtarësimi i Serbisë në Bashkimin Evropian, i cili do të kontribuonte më tej në stabilitetin në rajon si dhe prosperitetin dhe rritjen ekonomike.
Ai vuri në dukje se Shtetet e Bashkuara, si më parë, do të vazhdojnë të sigurojnë mbështetje për Serbinë në procesin e anëtarësimit në BE.
Godfrey shprehu pritjen që marrëveshjet në lidhje me bashkëpunimin midis Serbisë dhe Shteteve të Bashkuara, kryesisht Marrëveshja për Shkencë dhe Teknologji dhe Marrëveshja për Promovimin e Investimeve, së shpejti do të jenë në procedurën parlamentare dhe do t’i nënshtrohen ratifikimit nga Asambleja Kombëtare.
Ambasadori amerikan dhe Obradović biseduan për intensifikimin e marrëdhënieve amerikano-serbe, dhe Obradović vlerësoi se marrëdhëniet midis dy vendeve janë në vijën ngritëse dhe se bashkëpunimi po bëhet më i mirë.
Ai theksoi se është jashtëzakonisht e rëndësishme për Serbinë që të ketë bashkëpunëtorë dhe miq në Shtetet e Bashkuara, gjë që është gjithashtu interesi shtetëror i vendit tonë.
Në një bisedë me ambasadorin, ai vuri në dukje rëndësinë e Marrëveshjes së Uashingtonit, e cila u nënshkrua në shtator të këtij viti, zbatimi i së cilës kontribuon në bashkëpunimin rajonal dhe ekonomik, si dhe dialogun midis Kosovë dhe Serbisë.
