Republika Srpska, entiteti serb i Bosnjë dhe Hercegovinës, ka caktuar Ana Risic Babic si presidente të përkohshme, duke zyrtarizuar kështu largimin e Milorad Dodik nga ky post, pasi një gjykatë e shtetit e ndaloi të mbante poste politike.
Parlamenti i Republikës Srpska konfirmoi të shtunën emërimin e Babić, aleate e ngushtë e Dodik, duke u shprehur se ajo do të jetë në postin e lartë deri në mbajtjen e zgjedhjeve presidenciale më 23 nëntor.
Ligjvënësit e entitetit serb gjithashtu anuluan disa ligje separatiste të miratuara gjatë presidencës së Dodik, të cilat kishin sfiduar autoritetin e të dërguarit ndërkombëtar Christian Schmidt dhe Gjykatës Kushtetuese të Bosnjës.
Dodik, një nacionalist pro-rus, i cili pati kërkuar shkëputjen e Republikës Srpska nga Bosnja dhe Hercegovina dhe bashkimin me Serbinë, më parë kishte refuzuar të largohej nga detyra.
Ndërkaq, Departamenti Amerikan i Drejtësisë njoftoi të premten që kishte hequr sanksionet e vendosura ndaj katër aleatëve të Dodik – një lëvizje që Dodik e përshëndeti, ndërsa ka ndërmarrë një fushatë që të hiqen edhe sanksionet e vendosura ndaj tij.
Dodik aktualisht është i sanksionuar nga SHBA, Mbretëria e Bashkuar dhe disa qeveri evropiane për veprime që minojnë Marrëveshjen e Paqes së Dejtonit, të ndërmjetësuar nga SHBA, e cila i dha fund luftës së viteve 1992–1995 në Bosnje dhe Hercegovinë.
Nën Marrëveshjen e Dejtonit, vendi ndahet në dy entitete autonome: Republikën Srpska dhe Federatën Kroato-Boshnjake, të cilat kanë institucione të përbashkëta kombëtare, përfshi presidencën, ushtrinë, gjyqësorin dhe sistemin tatimor.
